SEGURADONG mamenosan bisan hangtod katunga (50%) ang gastos sa pagpanguma og humay gumikan sa mga makinaryas nga nadawat sa pito (7) ka rice farmers association sa Davao del Norte.

“Sa pagkakaron perte gyod namong lipaya kay makadawat mi’g mga ekipo gikan sa atong panggoberno. Dako kaayo na’g tabang sa among panguma. . Kaniadto labina panahon sa ting-harvest, kay lisod pangitaon ang tao, ang imong isa ka ektarya moabot pa’g isa ka semana kay tagduha lang ka tawo ang mag-harvest. Aning harvester, usa, duha ka oras human na ang imong isa ka ektarya. Dako kaayo na’g tabang sa mag-uuma. Dili na mabasa imong humay kay ang harvester dili moharvest og ting-ulan,” matod ni Tublihon Florida Small Water Impounding Association Chairman Rodolfo Galano sa Kapalong.

PInaagi sa RA 11203 (Rice Tariffication Law) nakadawat ang 7 ka rice farmers association sa Davao del Norte og tagsa ka combined rice harvester, tractor ug rice transplanter niadtong Martes, Hunyo 1.

Kini na ang ikaduhang higayon nga “nakasungkit” si Gobernador Edwin “Kuya Gob” Jubahib og mga makinaryas alang sa mga mag-uuma og humay. Niadtong Marso 18, 2021, ang parehas nga mga makinaryas nadawat sa 23 ka mga rice farmers sa probinsya.

“Kaniadto, tinuod, magpa-harvest mi maabtan mi’g isa ka semana kay ulan. Ang mang-harbesay mopadaplin sa. Dako na kaayo’g kausaban karon kay kung magpa-harvest mi, mag-request na lang og combined rice harvester. Mao nang dako kaayo mi’g pasalamat kay Kuya Gob ug sa iyang mga kaubanan labina na gyod sa DA PhilMec. . . Saludo gyod mi sa imo Kuya Gob,” matod ni Gina Ceballos, ang chairwoman sa Tubod Centro Lower Irrigator Association, Inc. sa Panabo City.

Ingong anak ug nagdako sa mag-uuma’ng ginikanan, nasinati pag-ayo ni Kuya Gob ang kinabuhi sa mag-uuma.

“Nakita nato sukad kaniadto lisod gyod mokita ang farmer tungod sa kadako sa production cost, sa labor panahon sa pagtanom. Pero tungod aning atoang mechanization program, fifty percent o baka sixty percent pa ang ma-discount sa mga farmers-irrigators production cost, dali pa ang inyong pagtanom ug pag-harvest,” mensahe ni Gobernador Jubahib atol sa turnover.

Gibutyag ni DavNor Provincial Agriculturist Jose Andamon nga niadtong 2020 sobra P126M kantidad sa makinaryas panguma ang nadawat gikan sa Department of Agriculture pinaagi sa Rice Competitiveness Enhancement Fund (RCEF) program og duna pa’y dugang niining 2021.

“Ang mahimong epekto ani unang-una mo-reduce ang production costs. . Pinaagi aning combined rice harvester kanunay mo-over 8-10 (sacks), so halos katunga ang ma-gain sa farmer,” matod ni PAGRO head Jose Andamon nga nagkumparar sa naandan nga “garab ug thresher” diin 16 ka sako ang mawala sa matag 100 ka sako gawas pa sa usik sa pagbugkot ug paghakot.

“Maningkamot ta molampos ni og usa ana ang pagtinabangay. Sa among part sa agriculture nag-hire mi’g mekaniko kay enkaso walay makakaya sa inyoha gi-seminar nga mga beneficiary og dili gyod makaya, among gamiton amoang mekaniko uban sa technical,” padayong pagdasig ni Andamon uban sa pag-awhag nga ampingan gyod ang mga makinaryas panguma.

“Nag expect ta kini magmalampuson; ug sa mga beneficiaries maningkamot pod mo, ayaw ninyo i-uran-uran ni kay kining atong gidamgo, ang gidamgo ni Kuya Gob mahaw-as sila sa kalisod, paniklop sa PAGRO head.