SUGDAN na ang pagtukod sa Singkwenta Milyones pesos kantidad nga Davao del Norte multi-purpose coliseum human nga gipahimutang ang “capsule” Hunyo 1, 2021.

“Kining atong project usa ni ka coliseum nga gitawag nato og multi-purpose coliseum. Nganong multi-purpose? Kay . . ang main purpose gyod ani mao ni ang back-up support sa atong KAAGAPAY program tungod aduna ni component nga cold storage,” pasabot ni Gobernador Edwin “Kuya Gob” Jubahib.

Ang KAwsa sa AGrikulturA ug PAnginabuhian sa barangaY (KAAGAPAY) maoy food security program ni Gobernador Jubahib tungod sa nasinating problema sa Davao del Norte gumikan sa COVID-19 nga pandemic. Sukad niadtong Hunyo 2020, gipasiugda pag-ayo sa KAAGAPAY ang pagtanom og gulayon diha sa tugkaran ingong dali makuhaan og pagkaon, pagpananom og kahoy ug ang pagbuhi og mga manok.

“Seguro matingala mo nganong na-coliseum? Ang first purpose gyod ani is big dome worth 500 million pesos time pa ni Congressman Pantaleon Alvarez nga siya ang Speaker of the House. Na-downloadan og first initial budget nga Fifty One million pesos. Unya nag-inquire ko sa DBM kung aduna pa ba’y additional for the construction of this gym. Giingnan man ko nga i-utilized na lang ninyo Gob ang project kay mao na lang gyod na siya ang atong mahatag. So to implement the funds from national government mao ning gihimo nato siyang multi-purpose coliseum,” dugang pasabot ni Kuya Gob.

Gawas nga suporta sa KAAGAPAY, dugang gipasabot ni Kuya Gob nga ang multi-purpose coliseum pwedeng maka-accommodate og dinagko nga kalihokan sa probinsya.

“So kung naa ta’y mga event nga dinaghanay pwede nato ni magamit. So dili na kaayo mabun-og ang atong air-conditioned nga gym. Magamit pa gyod nato sa atong purpose nga sufficiency program sa Davao del Norte. Mahimo nato siyang temporary trading post. . . So tanan nato nga harvest nga gulay, livestock pwede nato dalhon dire kay naa man siya’y cold storage. . So ang mahitabo, natabangan nato ang atoang mga farmers nga mokita sila sa ilang harvest kay dunay facilities nga mo-preserve para nga ang programa nato nga food-sufficiency program or food security sa Davao del Norte atong ma-continue kining program,” paniklop ni Kuya Gob.

Ang multi-purpose coliseum gitagalan og 450 ka adlaw alang sa konstruksyon apan matod sa RELY Project Manager humanon lamang kini sulod sa nubenta (90) ka adlaw.

“Ingon ko kay Maam nga kuhaon ko lang na sa three months,” matod ni RELY Project Manager Engr. Cesar G. Villagomeza nga nagpasalig kang DavNor PEO Assistant Department Head Engr. Jivelyn Co.

 

 

 

 

 

DavNor News