Gitunol na sa Philippine Coconut Authority XI ngadto sa Probinsyal nga Kagamhanan sa Davao del Norte ang tseke nga nagkantidad P17,000,000 alang sa pagatukorong Virgin Coconut Oil Processing Plant diha sa Barangay Limbaan, New Corella.
Dili lamang ingo’g suporta sa positibo nga resulta sa pagtuon nga gihimo sa Department of Health sa VCO nga epektibong pangpakgang sa covid-19, apan alang usab sa mga coconut farmers nga sa pila ka dekada nag-antos sa tumang kabarato sa presyo sa lubi hinungdan sa pagbiya sa ilang mga kalubihan o pagbalhin sa laing mga pananom.
Gipasiguro ni Provincial Agriculturist Jose L. Andamon nga mokita gyud ang maong planta tungod kay sa VCO pa lang daan, duna nay ready market. Dugangan pa gyud sa value-adding sa ubang mga by product sa lubi sama sa sapal nga himoong feeds, bagol nga pwedeng ulingon, bunot sa lubi himoong coconut coir ug ang tubig niini i-convert og juice.
Base sa datus sa Philippine Statistics Authority, ang lubi ang pinakaabundang produkto sa uma nga miokupar hantod 163,000 ektaryang kayutaan sa Rehiyon XI, sunod ang sagingan, gomahan, cacao ug abaca. Gilibutan pa gyud ug mga silingang lalawigan nga maoy nanguna sa natad sa lubi sama sa Davao de Oro ug Davao Oriental.
Gikan sa pagpanguma hantud sa pagbaligya sa mga produkto, sulti ni Gobernador Edwin “Kuya Gob” Jubahib nga andam mosuporta sa mga panginahanglanon sa mga mag-uuma kauban ang Sangguniang Panlalawigan ug mga department heads sa Capitolio aron mokita na gyud ang mga mag-uuma. Gipasalig usab niya kung magkulang ang inisyal nga P17M-badyet maningkamot ang probinsyal nga kagamhanan nga makasungkit og dugang badyet gikan sa nasyonal o mogahin og dugang pondo ang probinsya aron matuman ang dugay na’ng gipaabot nga sulbad nga maka-regulate sa presyo.
“Ato ning paningkamotan nga maimplement ni og insakto nga kining virgin coconut processing plant mahimo natong mapadako para kaya nato macater ang need sa atong mga coconut farmers. Kinahanglan usab makatabang ta sa ubang probinsya sa Davao de Oro ug Oriental,” dugang sa gobernador.
Si New Corella Bise Mayor Pedro H. Lagumbay Jr. nagbutyag sa pagpangandam sa ilang lungsod labi na karon nga madayon na gyud ang plano mismo sa ilang lugar.
“Sa budget para sa seedlings sa lubi naa mi gi-allocate nga funds nga gi-approve sa Sangguniang Bayan. Unya naa poy plano nga suportaran namo ang mga inputs labi na sa mga farmers nga walay ikapanghagbas. So naa mi livelihood nga giprepare. Gi-organize namo ang katawhan sa 25 lang ka members para manageable siya para mataga'ag support ang mga farmers nga wala gyuy ikasugod,” pagbutyag ni VM Lagumbay.
Apil sa nanambong sa maong katiguman sila Sen. Cynthia Villar Political Liaison Officer - Joel Mamac, Bise Gobernador Rey T. Uy, BM Roger A. Laguna, BM Nicandro T. Suaybaguio, Jr., BM Franklin D. Gentiles, BM Prospero E. Estabillo, Jr., BM Ariel Macla, BM Francisco C. Remitar, PA Engr. Josie Jean R. Rabanoz, PCA Tagum-OIC Provincial Manager Benigno G. Manatad ug pipila ka mga department heads sa DavNor Capitolio.
