Sakay sa dumptruck, mipauli na ang 22 ka mga pamilyang namakwit tungod sa baha nga dala sa bagyong “Dante” ngadto sa ilang tagsa-tagsa ka panimalay.

Ang uban kanila miabot og tulo ka adlaw nga nagpundo sa mga Barangay evacuation centers samtang nagpaabot mohubas ang tubig.

Sumala sa report nga gisumite sa Provincial Disaster Risk Reduction and Management Council nga 2,309 ka mga pamilya ang naigo sa baha nga kabahin sa lima ka barangay: Brgy. Alejal, Ising, New Camiling, Salvacion ug Asuncion (Cuatro-Cuatro).

Ang unang tulo sa nasangpit nga mga barangay ang grabeng naapektuhan sa baha hinungdan sa pagbakwit sa 13 ka mga pamilya sa pinakaduol nga barangay gymnasium. Nahumol sab sa tubig ang mga kahumayan ug kasagingan sa Barangay New Camiling rason sa pagkalugi sa 133 ka mga mag-uuma.

Tungod sa paspas ug abtik nga abiso ug kanunay’ng pagmonitor sa bagyo pinaagi sa Disaster team, daling miresponde ang Lokal nga Kagamhanan sa Carmen sa paghatag ayuda sa matag pamilyang apektado sa baha uban usab sa tabang nga gitunol sa Probinsyal nga Kagamhanan sa Davao del Norte ug Congressional Office sa Distrito 2.

Hinuon, way natalang nakalas nga kinabuhi ug mga nagubang mga gambalay.