NANAWAGAN si Davao del Norte Gobernador Edwin “Kuya Gob” Jubahib nga suklian sab sa katawhan og kakugi ang serbisyo publiko sa gobyerno aron kini mahimong epektibo.
Kini ang mensahe ni Kuya Gob ngadto sa tanang benepisyaryo sa 16 ka People’s Organizations sa barangays Mambago B, Caliclic, Catagman, Kinawitnon, Tagbitan-ag, Anonang ug San Isidro sa Island Garden City of Samal (IGACOS) atol sa pagtunol sa mga KAAGAPAY manok.
“Kinahanglan ta maningkamot kay di man pwede magtinapolan mo. Kay og di maningkamot di pod nato kaya magsige’g hatag bugas. . Ang hangyo nako kinahanglan magtinabangay. Mao nga ang slogan nato sa probinsya “One Team, One DavNor.” Gikinahanglang nga ang katawhan ug elected officials kinahanglang magtinabangay para sa gipangandoy nato nga kalamboan og kausaban sa matag pamilya” panawagan ni Kuya Gob sa mga Kaagapays nga maoy alang sa tanang Dabaonon sa tibuok probinsya.
Sukad sa paglingkod ni Gobernador Jubahib niadtong Hulyo 2019, giimplementar dayon sa iyang administrasyon ang “zero billing” sa tanang publikong hospitals, gipalalom ang mga kanal ug gi-desilt ang bukana sa suba aron dili daling mobaha, gisuportahan pag-ayo ang EO 70 nga programa sa peace and order nga maoy pipila lamang sa mga dagkong paningkamot para daling mahatod ang serbisyo publiko.
Sa pagsagubang sa COVID 19 pandemic, gilusad sa administrasyon ang programang KAwsa sa AGrikulturA ug PAnginabuhian sa barangay (KAAGAPAY) aron maagapan ang kanihit sa pagkaon pinaagi’g pagtanom og gulay, mga kahoy ug lakip na ang paghatag og manok uban sa tabang sa DOLE TUPAD program gawas pa sa mga trainings sa TESDA ug ubang ahensya.
Gusto sa Davao del Norte Gobernador nga pinaagi sa KAAGAPAY adunay dugang income ang matag pamilya.
“Kining atong programa nga KAAGAPAY mao ning programa nga nakita nako nga direct para sa matag pamilya. Tungod kay nasinati pod nako ang kalisdanan sa akong kinabuhi sa bata pa ko kay nasayod naman mo nga ang akong ginikanan mag-uuma. Kahibalo gyod ko unsay panginahanglan sa ubos. Mao ning akong nakita nga mahimong tubag para matag pamilya magkaroon og additional income, para ang pamilya mahatagan og kausaban sa kinabuhi. Dili man nato gikinahanglan nga mahimong milyonaryo apan kabalo ko nga atong gipangandoy mahimong bastante ang atong pamuyo,” mensahe ni Kuya Gob sa malipayong membro sa POs kay nakadawat og manok nga may P3,960 sa ilang paghimo’g kulongan.
Mapasalamaton nga misaad ang mga KAAGAPAY POs nga ayohon pagdumala ang manokan.
“Ang ako gyong ikaestorya daghan kaayong salamat kang Governor Jubahib nga gitagaan diay niya ang sama namo nga mga ultimo, gitagaan mi niya og pangpuhunan, gitagaan mi’g proyekto nga naa pod mi kalingawan nga at least kung ma-harvest naa pod ma-amo,” matod ni Leah Mina Pelisan.
“Kini sila pursigido, i-try nato, way komo sa pagsulay, sabayan pod nato’g pag-ampo nga mo-go gyod ang maong project,” matod sab ni Luminada Doguiles sa Purok 4, Mambago B, IGCS KAAGAPAY Farmers Assn.
Tumong gayod sa administrasyon ni Gobernador Jubahib nga mahimong sustainable program ang KAAGAPAY pinaagi’g pagtinabangay sa DavNor, DOLE, TESDA, Army, PNP, LGUs ug sa tanang stakeholders labina ang katawhan.
