GIDASIG ni Gobernador Edwin “Kuya Gob” Jubahib ang tanang taga Davao del Norte nga magpabakuna pananglit ang probinsya makapalit na og vaccine.

Kahinumduman nga sa dihang gi-implementar ang lockdown niadtong Marso 2020, milihok dayon ang probinsyal nga panggamhanan pinaagi sa pagtunol og ginagmay’ng hinabang ngadto sa 223 ka barangays sa tibuok probinsya apan nakita nga gikinahanglan gayod ang vaccine aron mabalik sa “normalidad” ang kalihokan sa tawo.

“Nag-pandemic ta kabalo gyod mo nga wa ta nagpasagad. Nanghatag ta og bugas tubag sa inyong panginahanglan. Alalay, tungod kay nagpandemic. Pero sa akong nakita karon nga tubag sa pandemic dili lang bugas. Gikinahanglan gyod nato nga mopalit og vaccine para ang tanan residente sa Davao del Norte 18 years old pataas, kinhanglan mabakunahan,” matod sa Gobernador nga subli-subli nag-awhag sa taga Island Garden City of Samal (IGACOS) atol sa paghatod sa mga KAAGAPAY manok niadtong Hunyo 4.

Gihulat na lang karon ang gikan sa nasyonal nga dungagan sa lokal nga pondo.

“Nagsabot na mi sa tanang mayors, nag-miting na mi nga kinahanglan tanan mabakunahan hangtod sa Senior Citizens para mahimong luwas ang kinabuhi sa kada Dabaonon sa Davao del Norte. Unya naa ma’y budget sa national government para sa bakuna, ang kulang mao to’y dungagan sa LGU, sa province. So mag-pool of resources mi, magtabang-tabang para ang tanan mabakunahan. . . Kinahanglan mabakunahan nato tanan,” padayong pagdasig ni Kuya Gob.

Aron mawala ang kahadlok og pagduhaduha sa daghan gibutyag sa Gobernador nga nakadawat na siya sa first dose nga wala hinuon itug-an kung unsa nga brand sa vaccine.

“Parehas na sa akoa sa una, mahadlok ko magpabakuna. Karon nabakunahan nako, first dose. . Mao na nga kinahanglan nato mabakunahan,” paghupay ni Kuya Gob.

Niadtong Mayo mibisita si Department of Health Dr. Annabelle Yumang ug mga kaubanan alang sa pangandam nga himoon sa taliabot mass vaccination.

 

 

 

DavNor News