KANTIDAD 200 MILYONES PESOS ang dugang pondo para sa Davao del Norte Malasakit Center ug pangpalit og Linear Accelerator machines (LINAC) diha sa Davao Regional Medical Center (DRMC) ang gitunol ni Senador Christopher “Bong” Go, Huwebes, Hunyo 10, 2021.

Ang Davao del Norte Malasakit Center (MC) gilunsad 2019 maoy “one-stop-shop” nga naghiusa sa mga opisina sa Department of Health (DOH), Philhealth, Department of Social Welfare and Development (DWSD) ug Philippine Charity Sweepstakes Office (PCSO) aron ang mga pasyente mogawas sa hospital nga walay bayaran.

Ang MC maoy dako kaayong komplimento sa programa sa administrasyon ni Gobernador Edwin “Kuya Gob” Jubahib nga sa pagsugod sa iyang termino niadtong Hulyo 2019, iya dayon gipatuman ang “zero billing” diha sa tanang gobyerno hospital sa probinsya.

Gikan sa maong pondo, mopalit sab ang DRMC og mga Linear Accelerator machines aron magamit pagtambal sa mga pasyente nga nagka-cancer.

Ang DavNor MC maoy isa sa 118 ka mga Malasakit Centers sa tibuok Pilipinas.

Atol sa iyang pagbisita, nagpa-raffle sab ang senador og 20 ka bisikleta, mga sapatos, ug tablet alang sa mga frontliners samtang libreng nanghatag og mga vitamins, face shields ug face masks.