Gipaniguro sa duha sa dagkong opisyales sa law enforcement agencies sa Davao Region nga modaogay na ang gobyerno ni Presidente Rodrigo Duterte sa kampanya niini batok ginadili nga droga.
Ingon ni Philippine Drug Enforcement Agency (PDEA)-XI Regional Director Antonio Rivera na hapit na siyento porsiyento ang kadaugan sa gobyerno sa nagpadayong giyera sa illegal drugs, kung itandi sa nagligad nga administrasyon.
“Masulti nako nga 90 percent we are winning the battle against illegal drugs as compared sa previous administration,” pahayag ni Rivera, atul sa press con sa pagsunog sa mga dinakpang droga ganinang buntag sa DavNor Sports Complex.
Dunay 311.7376 ka gramo sa shabu ug 19 ka kilo sa marijuana ug mga paraphernalia ang gidabdaban sa mga opisyales, nga nagkantidad og P7 milyones.
Pasabot ni Philippine National Police (PNP)-XI Regional Director BGen. Filmore Escobal nga gisunog ang mga kontrabando aron siguradong dili na kini ma-recycle ug mabalik sa kadalanan.
Gisegundahan sab sa heneral nga kung dili tungud sa dakong kalampusan sa kampanya sa presidente batok droga, nahimo nang narco-state ang Pilipinas.
“Had it not been for the intervention of this administration, baka napunta na tayo sa tinatawag na narco-state,” sulti ni Escobal.
Ang nar•co-state usa ka estado diin ang ekonomiya sa nasud nagadepende na sa patigayon sa illegal nga droga.
Iyang gipahingusgan ang paglig-on sa barangay clearing operations, aron mawala na ang demand sa droga ug mawad-an na og costumer ang mga drug pusher.
Si Gobernador Edwin “Kuya Gob” Jubahib mipasalig sab sa padayong suporta sa probinsya sa tanang operasyon batok droga, human nga iyang gipasalamatan ang kahago sa mga agents ug operatiba taliwala sa pandemya.
“We need to end the illegal drug trade to secure the future of our country… All-out ang atong suporta sa atong mga law enforcement agencies ug tanan atong ihatag sa kalampusan sa mga operasyon aron mahimong luwas ang atong mga komunidad sa droga,” sulti sa gobernador.
Siya sab nanawagan alang sa mas taas nga silot nga ipahamtang sa mga drug users, isip paagi aron mahadlok sila.
Apan, gipasalig niya ang tabang sa probinsiya alang drug offenders, pinaagi sa Bahay Silangan Reformation Center, nga iyang gitukod sulod sa Kapitolyo.
“Atong gitukod ang Bahay Silangan for voluntary drug surrenderees or caught in drug operations aron nga ma-reform sila, matudluan sila sa values formation ug skills training… kay dili lang sa droga mokita kundili daghang paagi aron mokita sila nga safe ug dili makahatag kadaot sa mga kabataan,” pahayag niya.
