Nakadawat og 81 units nga family tents ang probinsya sa Davao del Norte karong adlawa, Hunyo 15, 2021 gikan sa Department of Social Welfare and Development (DSWD) Region XI pinaagi sa pakigtambayayong sa Provincial Social Welfare and Development Office (PSWDO) nga i-apod apod sa 7 ka Local Government Units (LGUs) ug sa 3 ka probinsyal nga District hospitals isip dugang nga isolation facility ug holding area sa mga pasyente ug residente.
Matod pa ni PSWD Officer Rose Rapista, mapasalamaton sila sa DSWD tungod magamit ang mga family tents sa mga LGUs ug sa mga District Hospitals diin tag-as na og kaso sa Covid-19.
“Karong adlawa pasalamat ta og dako sa Department of Social Welfare and Development Region XI pinaagi sa atong Regional Director si ma’am Raquel Nuñez diin naghatag sa atoa og 81 units nga family tents kani siyang family tents magamit jud siya karon nga time sa pandemic diin mahimo ni siyang isolation facility sa atoang tagsa-tagsa ka mga LGUs so nag vary ang requests sa LGUs naay tag 20 ka family tents wherein naga saka sab ilang cases sa Covid-19. So kini nga mga family tents, dako g’yod kaayo ni siya og tabang especially sa atong District Hospitals na magamit siyang triads pag-abot sa ilaha. Magamit sad siya nga mahimong isolation facility sa tagsa-tagsa ka hospitals ug LGUs,” sulti ni PSWD Officer Rapista.
Mihangyo sab si Rapista sa mga benepisyaryo sa family tents nga ampingan og maayo ang mga nadawat aron dili basta-basta madaot ug daghan pa ang maserbisyohan niini.
“Sa tanan natong beneficiaries sa atong local counterparts hinaot unta na kaning tents na gihatag sa atoa magamit gayod kini sa atong mga ginalaom nga magamit and naga hinaot sab ta nga ato ning ampingan nga maka serve ni og dugay pa sa atong tagsa-tagsa ka LGUs,” pahinumdom ni PSWD Officer Rapista.
Nagkantidad og P17,400 ang family tents ug adunay 6 nga madawat ang munisipyo sa Asuncion, 5 sa Kapalong, 20 sa Sto. Tomas, 20 sa San Isidro, 10 sa Braulio E. Dujali, 5 sa Panabo, 5 sa Carmen. Makadawat sab og 4 nga family tents ang Kapalong District Hospital, 4 sa Carmen District Hospital, ug 2 sa IGACOS District Hospital.
Nagpadayag sab si John Carlef Balacuit, Clerk III sa Panabo City Social Welfare and Development Office (CSWDO), sa ilahang pagpasalamat sa DSWD human nila nadawat ang 5 ka family tents nga magsilbing isolation facility sa mga Covid-19 nga pasyente ug holding area alang sa mga residente sa Panabo.
“Atong na-receive karon is lima ka family tents from DSWD. Actually ikaduha na namo ni nga nagdawat sa DSWD og family tents so last time, nakadawat pud mi og lima. Sa karon sa second batch, lima na pud. Katong lima, gigamit namo sa among City Health para sa Covid-19 facility karon, pwede siya magamit as Covid-19 facility or isolation facility at the same time pwede pud siya holding area para sa among centers sa mga bata ug residente sa Panabo City. In behalf sa CSWDO kay ma’am Charina Joy Laquin ang among CSWDO Department Head, kami mapasalamaton sa DSWD-XI sa continue paghatag og family tents,” sulti ni Balacuit.
