NAGHIUSA ang DavNor KAwsa sa AGrikulturA ug PAnginabuhian sa barangaY (KAAGAPAY) ug ang Poverty Alleviation and Development for Rural Economy (PADRE) sa New Corella aron mahaw-as sa kalisod ang katawhan sa maong lungsod.

“Unsa ang mga aims sa PADRE? Unang-unang naa unta ta’y maayong relasyon sa atong komunidad. . Wala gyo’y perpekto nga organisasyon. . Ang ikaduha, mahaw-as sa kalisod ang mga kaigsoonan nato. Ug ang ikatulo nga atong gipanghingusgan karon mao ang peace and order,” pasabot ni New Corella Mayor Jorjan “Monet” Federiso labot sa flagship program nila Vice Mayor Pedro Lagumbay ug Sangguniang Bayan atol sa midterm assessment Hunyo 22.

Kahinumduman nga ang KAAGAPAY gilunsad ni Gobernador Edwin “Kuya Gob” Jubahib Hunyo 2020 sa tumong nga maagapan ang kanihit sa pagkaon gumikan sa COVID-19 pandemic.

Nag-aghat dayon ang KAAGAPAY sa pagtanom og gulay, pagpananom og kahoy nga gitabangan sa TUPAD program sa DOLE ug ang pagbuhi’g manok nga tanan gihatag libre sa probinsyal nga panggamhanan.

Kahinumduman sab nga panahon ni kanhi Mayor Jose Ricaredo Federiso (amahan sa incumbent mayor) nahimugso ang PADRE og sa pagre-launch niini sa miaging tuig mas gipaayo pa gyod.

“Sa una ang PADRE ipahiram sa isa ka asosasyon sa zero interest, bayaran siya within ten years. Pero karon dili na nato siya ipahiram kundili i-grant na nato,” pahayag ni Mayor Monet.

Parehas sa KAAGAPAY nga People’s Organizations ang mga benepisyaryo, kasamtangan dunay 40 ka POs ang PADRE.

Sanglit pondo sa gobyerno, gipaningkamotan nga ma-sustain ang mga livelihood programs.

“Mao nang naa ta’y monitoring team kay aim ani nga programa nga mo-sustain, molahutay bisan pa ug dili na kami ang modumala kay ang politiko come and go ra sa posisyon; nga continue gyod ang maong programa. . Ang ilaha na lang diria isip ilang counterpart, ang ilang obligasyon na lang mao ang pag-atiman ug pag-embrace nga tarungon gyod pagdala kay para man ni sa ilang kaugalingon,” pasabot ni Mayor Federiso.

Kay managsama og tumong ang programa sa DavNor ug New Corella, gitawag kini sa Mayor nga “KAAGAPAY ni PADRE.”

“Mao ning gitawag KAAGAPAY ni PADRE. Nihaom siya. Actually ang KAAGAPAY ni Kuya Gob, last week lang niari gyod si Kuya Gob, iyaha gyong gi-acknowledge. . Full support gyod ang Federiso-Lagumbay sa programa ni Gob kay sayod jud ko nga matag organisasyon dili pa man sila kumpleto, so ang amoang administrasyon motabang gyod sa KAAGAPAY,” pasalig sa mayor.

Subay sa Executive Order 70 ni Presidente Rodrigo Duterte sa pagtapos sa insurhensya, gihatagan prayoridad sa KAAGAPAY ug PADRE ang marginalized Indigenous People (IPs) nga mao ang daling ma-recruit sa mga NPA.

“Sa mga 40 ka POs actually naay POs direa nga kadtong nagbalik-loob nga mga kaigsoonan, kay tungod nakita niya ang programa nga PADRE, nga tinuod gyod diay nga naay gobyerno nga naglantaw sa panginahanglan sa katawhan,” pagtug-an sa New Corella Mayor.

Tumong sa PADRE nga moabot 100 POs karong tuiga aron sab daghan ang matabangan.