Nagpagawas sa ilang opisyal nga press release ang Department of Health niadtong Hunyo 21, 2021 may kalambigitan sa mitumaw nga bag-ong covid-19 variants sa nasud.
Subay sa pinakauwahing report sa whole-genome sequencing (WGS), tulo ka United Kingdom o Alpha variant (B.1.1.7) ug 11 ka South Africa o Beta variant (B.1.351) nga mga kaso ang nakitaan gikan sa mga specimen nga gisumite sa Davao region niadtong Hunyo 3 ug Hunyo 10.
Sa Alpha variant nga mga kaso, duha niini gikan sa Davao City ug usa gikan sa Davao del Norte nga 38 anyos, lalaki, walay sintomas ug kasamtangang nakaconfine sa probinsyal nga isolation facility.
Samtang sa Beta variant, lima gikan sa Davao City ug unom gikan sa Davao del Norte. Kasagaran kanila walay sintomas o nakasinati’g mild to moderate symptoms lamang. Ang tulo sa taga Davao del Norte kasamtanangang nagpaalim usab sa probinsyal nga isolation facility.
Sumala sa inisyal nga imbestigasyon nga gihimo sa Regional Epidemiology Surveillance Unit kauban ang mga hintungdang LGUs, ang tanang nasangpit nga kaso dili mga OFW ug dili managkaila sa matag usa. Nagpadayon pa ang imbestigasyon kung kining mga tawhana dunay exposure sa mga tao nga dunay travel histories.
Gipalapdan hantud sa 3rd generation ang contact tracing sa mga LGUs ug ang tanang mailang close contact sa mga nabiling upat ka mga aktibong kaso sa Davao del Norte i-prioritize sa RT-PCR testing. Ang tanang first generation close contacts, bisa’g negatibo sa test, kinahanglan magpailawom sa istriktong 14-day quarantine sa usa ka pasilidad.
Subling gipahinumdoman sa DOH ang mga LGUs nga palig-onon ang mga quarantine protocols, testing ug isolation. Bisa’g unsa pa nga variant, gidasig ang publiko sa istriktong pagtuman sa minimum public health standards aron mapugngan ang pagtinakdanay sa covid-19 ug labaw sa tanan malikayan ang pagtungha sa mga bag-ong variants.
Aron mas protektado gikan sa makamatay nga bayrus, ang tanan giawhag nga magpabakuna sa panahon sa ilang turno ug siguraduhong kompletuhon ang duha ka dosis.
© Department of Health Davao Region
