MASALIGON ug walay lipod-lipod nga gipahayag ni Gobernador Edwin “Kuya Gob” Jubahib nga iyang gituman ang gisaad tinud-anay nga mga serbisyo atol sa ikaduhang State of the Province Address (SOPA) Hulyo 1, 2021.
“Lig-on kita nga miatubang sa mga hagit. Atong gihanyag ang serbisyong tinud-anay. Wala kita maghunahuna sa sunod nga eleksyon. Ang buhat maoy akong ginapasulti sa pagtuman sa atong mga saad. “Walk the talk,” matod sa ni Kuya Gob ngadto sa katawhan sa Davao del Norte nga giuyonan sa mga board members ug department heads.
“Walk the talk. Mao gyod na kay naay ginaingon ang buhat maoy pasultihon. Mao na’y akong nakit-an sa atong gobernador kay bisan sa kadaghan sa barangay, motuyok gyod na siya, iyaha gyod nang bisitahon ang 223 ka barangay alang sa pag-assess, pag-check, pag-monitor sa atong probinsya. Makit-an gyod nato unsa siya ka-aktibo, ka-madasigon sa pag-monitor, pag-check sa kahimtang sa atoang barangay. I think this is first time to happen nga mounay jud ug adto ang atoang gobernador,” pag-uyon ni SK Federation Chairman ug ex-officio Board Member Dave Silutan.
“Very well said, very well explained ug kanang tanang giingon ni Gov naabot gyod nato. Salamat sa sinseridad sa atong gobernador sa panerbisyo, sa katawhan ug sa mga opisyales nga nagtinabangay gyod alang sa kalamboan sa probinsya,” matod ni Engr Joyce Gualberto sa Provincial Assessor’s Office.
“As mentioned, ang iyahang mga programa haom gyod sa atong katawhan dire sa probinsya labina sa mga kaigsoonang naglisod jud, sa atong mga IPs nga iya gyong priority, mao nang saludo ko kay Kuya Gob, which is naa gyod siya’y golden heart nga mitabang gyod sa atong katawhan sa Davao del Norte,” dason ni District II BM Jannet Tanong Maboloc.
“Job well done. Naasoy pag-ayo ang mga nahuman ug ang to be implemented pod nga mga proyekto labina tong proceeds sa P200M loan for tourists destination. I salute Kuya Gob hoping ma-implement og early para mapakinabangan dayon sa atong mga constituents,” pahayag ni District I BM Roger Laguna nga nanghinaut ang pandemya dili maka-babag sa implementasyon.
“Congrats Kuya Gob Jubahib for the job well done. For the past two years naipakita nimo ang imohang tiunay nga pagserbisyo sa katawhan sa Davao del Norte ug isip lider sa tanang konsehal sa probinsya mahugtanon ang among suporta kay nakita pod namo ang imohang kinasingkasing nga pagtagad ilabina sa katawhan nga mga pobre,” pag-uyon ni DavNor Philippine Councilors’ League President ug ex-officio BM Silvino Matobato, Jr.
Alang kang DavNor FABC President, ex-officio BM Dindo Parangan, bisan sa pandemya halos na-deliver tanan sa gobernador ang gisaad.
“Bisan pa sa atong gisagubang nga pandemya, nakita nato almost 100% gyod ang accomplishment sa atong Governor. Kuya Gob, ang tibuok 223 barangays sa Davao del Norte naa ra mi kanunay, 100% to support you,” matod sa FABC prexy.
Bisan kung wala nakab-ot sa ilang opisina ang target gumikan sa pandemya uyon kaayo si DavNor PTO head Evelyn Espra sa “walk the talk” nga SOPA sa gobernador.
“Bisan wala namo nakab-ot ang among target kay mao ni ang dakong epekto sa pandemic, nakatabang ang atong gibuhat nga strategy aron lang gyod makasuporta sa lain-laing mga proyekto nga gilunsad sa atong probinsya. Congratulations Kuya Gob,” matod ni Ms. Espra.
Tungod sa pandemya, wala ra’y 50 ka tawo ang mitambong sa ikaduhang ulat ni Kuya Gob nga naka-angkla sa KUYA GOB development agenda nga gipangunahan ni Vice Gov Rey T. Uy ug mga opisyales. VIRTUAL ang paghatod sa SOPA pinaagi sa PTV channel 48, LoveNet TV channel 26, One DavNor Network ug PTV DavNor 48 facebook pages.
