Atol sa kasaulogan sa ika-54 nga Kasumaran sa Probinsya sa Davao del Norte, gipahigayon ang pinakaunang indigay sa nagkadaiyang sugilanon sa kalampusan sa mga kanhi iskolar sa Davao del Norte Learning Institute kon DNLI.

Gikan sa orihinal nga 11 ka mga entrante, lima ka mga empleyado sa gobyerno ang nagbangga sa final round diin ilang gisaysay pinaagi’g video kung giunsa nila pagsagubang ang mga pagsulay aron lang maangkon ang gitinguhang diploma.

Sumala ni Provincial Information Officer ug DNLI Executive Director, Dr. Mervin Jay Z. Suaybaguio, nga ang de-kalidad nga edukasyon libre kining gitanyag sa Probinsyal nga Panggamhanan sa Davao del Norte pinaagi sa DNLI alang sa mga empleyado sa gobyerno gikan sa nasyonal nga ahensiya ngadto sa barangay nga haum usab sa ilang 'busy' kaayo nga schedule sa tinguha nga i-professionalize ang serbisyo publiko sa probinsya.

Gikalipay sa mga nisalmot nga iskolar ang pag-apil sanglit usa kini ka higayon aron maawhag nila ang ilang mga kaubanan sa panggamhanan nga nangandoy nga makahuman sa kolehiyo ug makasaka sa ilang posisyon sa gobyerno. Buot usab nila ipasantop nga dili pa ulahi ang tanan ug andam motabang ang panggamhanan pinaagi sa DNLI kauban ang Davao del Norte State College.

Matud pa ni Gobernador Edwin “Kuya Gob” Jubahib nga dako iyang suporta sa pagmugna niining programa kay alang kaniya importante usab ang edukasyon. Gidayeg niya ang programa nga naghatag ug inspirasyon sa mga trabahante sa gobyerno lakip na ang mga public officials ug barangay functionaries.

Si DNSC College President, Dr. Joy M. Sorrosa, usa sa mga saksi sa mga kabag-ohan nga nasinati sa kinabuhi sa kanhi mga iskolar sa DNLI. Saludo siya sa tanang iskolar nga nisalmot labi na sa usa ka yanong senior citizen nga naningkamot gayud makalampos sa pag-eskwela. Kini pagpamatuod nga ang edad ug ang kalisud dili babag sa pagkab-ot sa mga pangandoy. Nanghinaot siya nga mapadayon ang nasangpit nga programa aron daghan pa ang molambo ug ma-professionalize sa ilang pagpanrabaho.

Ang mga nakadaog sa Most Inspiring DNLI Success Stories Contest mao sila Ryan Sagaral gikan sa PLGU Davao del Norte alang sa unang ganti; Martin Aninipot gikan sa LGU Tagum City ug Michael H. Sebuco sa DSWD – Davao Del Norte Provincial Operations Office, alang sa ikaduha ug ikatulong ganti; Welfredo D. Cańete sa LGU Carmen ug Ms. Liezl Joy E. Quezon sa Davao Regional Medical Center nga graduate sa Master of Public Administration, isip finalists.