NALIPAY pag-ayo ang pamilyang Tormon sa Pagsabangan, Tagum City samtang gitimbang ug gi-klasipikar sa mga staff sa Davao del Norte Investment Promotion Center (DNIPC) ang bag-o nilang gi-harvest nga mga gulay Martes, Hulyo 6.
Ang DNIPC mao ang gitahasan og nagsilbing ‘marketing arm’ sa KAwsa sa AGrikulturA ug PAnginabuhian sa barangaY kun KAAGAPAY, nga mismo moadto sa lugar sa mag-gugulay aron paliton ang ilang produkto.
Ang pamilyang Tormon sobra na duha ka tuig nagtanom og gulay ug sa wala pa nahimong benepisyaryo sa KAAGAPAY ngadto kang bisan kinsa lang nila gibaligya ang ilang produkto.
“Bisan kinsa lang, bisan asa nga available, didto ra nako ipasa. Ginakontak-kontak, ginasuroy-suroy lang namo dinhi,” matod ni Mrs Sheena Tormon samtang mapasalamaton kaayo sa KAAGAPAY, ang food security program sa administrasyon ni Gobernador Edwin “Kuya Gob” Jubahib.
Makaduha mag-harvest sa ilang tanom ang pamilyang Tormon nga wala na’y kahadlok nga dili mahalin ang mga gulay.
“Lahi ra gyod kay makahatag og semilya, unya naa na ka’y kapasahan. Nindot gyod siya. Kanang dako jud kaayo siya’g ikatabang sa amoa; mahurot among gulay; makahatag og semilya unya makuha pod among gulay,” pagkumparar ni Mrs. Tormon sa una nga dili pa sila membro sa KAAGAPAY.
“Gamay” man ang halin kay sobra lang P400, apan alang sa pamilyang Tormon dako na kaayo og tabang” ang KAAGAPAY sa mga sama nila.
“Salamat jud kaayo kay Gob kay dako jud nakatabang ang KAAGAPAY sa amoa. . Salamat jud kaayo,” matod ni Sheena nga puno sa apresasyon.
Dili lang ang pamilyang Tormon ang naka-apresyar sa KAAGAPAY apil na ang laing 31 gagmay’ng mag-gugulay sa Pagsabangan, Tagum City.
Kahinumduman nga gumikan sa COVID-19, gilunsad ni Kuya Gob ang KAAGAPAY niadtong Hunyo 2020 aron mapugngan ang kanihit sa pagkaon dala sa pandemya. Giawhag niini ang pagtanom og gulayon bisan diha sa tugkaran, nananom og mga kahoy uban sa TUPAD program sa DOLE ug nanghatag og mga free-range chicken nga mao ra sab ang mag “buy-back” sa mahimong produkto sa mga benepisyaryo.
Ug niadtong Hunyo 24, paglabay sa 41 ka adlaw gikalipay sa mga KAAGAPAY beneficiaries sa Panabo City dihang gi-harvest ang ilang gipadagko nga manok kabahin sa first batch sa nahatagan og free-range chicken.
