Ang kinabuhi sa katawhang Dabaonon ang mas bililhon kaysa sa ekonomiya.
Kini ang subling gipahingusgan ni Governor Edwin I. Jubahib atol sa iyang ika-duhang State of the Province Address (SOPA), aron ipasabut nganong gipailawom niya balik ang probinsiya ubos sa General Enhanced Community Quarantine (MECQ) gikan Hulyo 1, 2021 tungud sa padayong pagtaas sa kaso sa Covid-19.
“…mas importante ang kinabuni sa matag-usa ka Dabaonon,” sulti niya.
Dungan niini, kusganong gihangyo sa gobernador ang tanan sa pagsunod sa mga safety protocols, sama sa pagpuyo sa balay, pagsuot sa mask, pagtuman sa social distancing ug minimum health standard.
Iya sab giawhag ang katawhan sa paghibalo sa saktong impormasyon ug sa pagsunod sa mga guidelines sa MECQ.
Sa iyang SOPA, gipadayag ni Kuya Gob ang kadaugan sa iyang administrasyon bahin sa panlawas sa tuig 2020.
Nagpabilin kitang madasigon ug lig-on sa paghimo sa atong pinakamaayo alang sa kaayuhan sa mga Dabaonon.
Apil niini ang dul-an 30,000 ka mga pasyente nga natabangan sa Zero-Billing program sa probinsya, diin wala silay nabayran nga hospital bills ug duna pa jud silay nadawat nga mga tambal sa ilang paggawas sa tulo ka mga provincial hospitals.
Nahimo sab nga modelo ang probinsya sa pakigbatok sa Covid-19.
“Kita ang pinaka-unang probinsya sa rehiyon nga miimplimentar sa DavNor Covid-19 Contact Tracing System (DCCTS) ug sa ‘No QR Code, No Transaction Policy’ sa tanang buhatan sa gobyerno ug business establishments,” butyag ni Kuya Gob.
Gilusad sab sa probinsya ang COVID-19 Testing Center sa probinsya, kauban ang mga dakbayan sa Tagum, Panabo ug Island Garden City of Samal, Davao Regional Medical Center ug ang University of the Philippines (UP) – Mindanao, ug Maer Summit Konstrukt.
Nagpatukod sab ang probinsya sa 216 ka mga isolation rooms sa kantidad nga P21.6 million, gawas pa sa gatosan ka mga isolation rooms nga gihimo sab sa mga nagkadaiyang LGUs.
Nakahatag pud ang probinsya sa 1,121,103 ka food packs sa tulo ka hugna nga relief distributions niini, alang sa kapin 370,000 ka pamilyang Dabaonon, diin si Kuya Gob mismo ang personal nga nihatud sa mga food packs sa tugkaran sa mga barangay.
Apil sab niini ang mga food packs nga gihatod sa 14,025 ka PWDs, 26,385 ka senior citizens ug 70,960 ka traysikel ug PUJ drivers/operators.
Tungud sa gipakusog nga serbisyong panlawas sa probinsya, dako ang pag-ubos sa kaso sa namatay nga mga inahan panahon sa panganak, gikan sa 129.32% per 100,000 livebirth niadtong 2019 ngadto na lang sa 47.40% niadtong 2020. Ang mga namatay nga bata lima ka tuig ang edad paubos mius-os sab gikan sa 12.90% per 1,000 livebirth ngadto na lamang sa 11.13% pagka-2020.
Ang SOPA ni Kuya Gob, gipahigayon atul sa selebrasyon sa ika-54 nga Araw ng Davao del Norte, nga gihimong simple lamang ug pipila lang ka mga opisyales ang gipatambong, agi'g pagsunod sa guidelines sa MECQ. (Nobags)
