MAGHIMO ug dinaghan nga vermicast (humus/tai sa wati) ang probinsyal nga panggamhanan ni Gobernador Edwin “Kuya Gob” Jubahib pinaagi sa Provincial General Services Office (PGSO) dili lang pang-abono para sa mga bulak ug tanom nga naa sa DavNor nursery kundili para sa programang KAAGAPAY.
Uban sa suod nga koordinasyon sa Provincial Agriculture Office (PAGRO), gipahimutang ang 12 ka “vermi beds” sulod sa PGSO nursery, ang dapit-depositohanan sa mga bulak ug tanom nga gigamit sa tanang opisina sa DavNor Kapitolyo.
“Kani lang atong nursery daghan kaayo ta’g tanom, tapos gapalit ta og fertilizer. So why not di na lang ta mopalit, dire na lang production nato. Nakit-an pod nako karon sa atong KAAGAPAY nagkinahanglan siya’g mass production,” matod ni Acting PGSO department head Dr. Joseph Nilo Parreñas sa katuyoan nganong iyang gihimo ang vermicasting dinhi sa Kapitolyo.
Ingong usa sab ka mag-uuma, si Dr. Parreñas nga kanhi mayor sa lungsod sa Asuncion, Davao del Norte, nag Vermicasting na panahon sa iyang termino nga gipadayon hangtod karon sa nagsunod nga administrasyon. Kini nakadugang sa local income sa LGU nga andam sab niyang himoon pag-abot sa Kapitolyo.
“It will add income to the province. For example sa Asuncion naay gapalit sa una og tig 5,000 sacks organic fertilizer. Unya tig 200 man to, pila na na? Unya makambyo ang hunahuna sa tawo from chemical to organic. . Ang pinakauna magpalit ani mga department heads kay miingon naman sila daan. Tig P300 per sack ang pure vermicast. Naa na ni sa atong tax code, naapil na ni. And then aside ani nag-plano ko, again in coordination with PENRO and PAGRO, mag-produce na ta og atong organic fertilizer wherein isa lang ni ka component,” pagtug-an sa PGSO head.
Dugang gitug-an sa doctor nga alang sa mass production, iya kining ipahimutang didto sa Luntiang Paraiso Regional Rehabilitation Center (LPRRC) nga adunay dakong lugar himoan sa vermicasting ug ingong Center Head iya nang giplano nga iapil kini sa “healing process” nga aktibidades sa mga residente.
“I-present nato ni kay Kuya Gob . . Akong hunahuna naa man ta’y daghang kauban sa Luntian, as part of their process sila atong pahimoon. Sila ang manpower, ang mga residents. Aron pod dili sila bored didto, naa sila’y himoon kada adlaw. They will own the project,” pagbutyag sa PGSO ug LPRRC head.
Kasamtangang gigamit sa PGSO vermicasting ang goat manure, panit sa saging cardaba, mga papel, ug karton nga matod sa PGSO head “paboritong” pagkaon sa mga wati.
******************////
