Sulod sa 16 ka tuig, padayon ang paglambo sa Purok Lettuce, Gawad Kalinga sa siyudad sa Panabo pinaagi sa pag-establisar sa matag residente og abundang mga tugkaran nga maoy nakatabang pagsuplay sa ilahang pagkaon ug dugang halin isip pang adlaw-adlaw nga panginabuhian.
Tuig 2005, adunay 38 ka mga balay nga gi-award sa magtiayong Dr. Primo Andres ug Sylvia Arguelles Andres, mga benefactors gikan Amerika, ngadto sa mga pinili nga poorest of poor gikan sa lain-laing lugar aron mahatagan sila ug higayon nga maka-angkon og kaugalingong puluy-anan ug dili na makadugang sa problema sa gobyerno sa mga eskwater.
Matod pa ni Zenaida Sangilan, Secretary sa Purok Lettuce, kinahanglan mu-agi usa og Bayanihan ang residente bag-o makasulod ug makapuyo sa ihatag nga balay. Gipabuhat sab sila og individual ug communal garden gikan sa mga gipang apod-apod nga semilya sa mga Non-Governmental Organizations (NGOs), lokal ug probinsyal nga panggamhanan aron suporta sa ilahang inadlaw nga konsumo.
“Bago mi makasulod diri, aron dili kaayo mag problema ang nagpuyo tungod sa kapobrehon, gi require mi diri og individual ug communal garden ug naa usab mga tawo nga naghatag kanamo og semilya para mapalambo namo among garden. Gitagaan mi’g mga semilya, naay mga NGO, sa city government hantod naabot mi sa province naga padayon gihapon og support para among itanom. Dako kaayo ni og tabang dili lang sa among konsumo kondili nakapamaligya sab mi,” sulti ni Purok Lettuce Secretary Sangilan.
Nahimo sab silang parte sa KAAGAPAY program ni Governor Edwin “Kuya Gob” Jubahib maong dili lang mga semilya ang ilahang nadawat pinaagi sa tabang sa Barangay Extension Workers (BEWs) apan apil sab ang livestock sama sa manok nga personal gitunol sa gobernador sa ilaha.
“Part ni siya sa KAAGAPAY Program. Ang ubang semilya na gipanghatag sa amoa gikan didto kauban sab ang BEW, siya ang naga update sa amoa unya ginatagaan pud mi nila padayon og suporta sa mga tanom namo. Ang mga manok gikan sab sa KAAGAPAY, kang Gob. Si Gob jud mismo naghatag sa manok namo diri. Unya niadto jud siya aron ipahiluna to among manokan diha sa likod. Kami jud number one makabenepisyo sa among gipangtanom kay bisag bugas lang ang naa sa amoa, naa na mi pang pares sa among pagkaon unya daghan sab mag suroy diri aron mopalit kay ang mga gulay diri is organic, wala mi naga gamit diri og mga fertilizer nga synthetic,” ingon ni Purok Lettuce Secretary Sangilan.
Naila sab nga Agri-tourism spot ang purok Lettuce ug nakadawat og lain-laing mga pasidungog sama sa pagkab-ot sa 3rd Place sa unang pag-apil nila sa Binulig Festival, 2nd place sa ikaduhang pag apil, Champion sa katapusang pag-apil ug nahimong Champion usab atol sa Provincial Summit. Gikan sab sa ilahang komunidad ang top 10 sa Luntiang Pamumuhay Kontra Covid-19.
Ang mga komon nga gulay na makita sa ilahang mga tugkaran mao ang kangkong, talong, okra, kalabasa ug lettuce nga dako’g natabang sa ilaha kay paspas mabaligya tungod sa organic nga pamaagi sa pagbuhi. Matod pa sa usa ka residente nga si Ethel, igo ra nila i-butang sa social media ang mga picture sa gulay unya daghan na ang mamalit niini.
Na mintinar sab sa nila ang Peace and Order pinaagi sa pagpatuman og mga balaod na kinahanglan sundon sa matag residente aron malikayan ang kagubot ug dili mapahawa sa ilahang komunidad.
Mihangyo usab sila nga magpadayon ang paghatag og suporta sa KAAGAPAY ug sa mga lokal nga panggamhanan sa ilahang komunidad aron magpadayon sab ang ilahang pag-uswag.
