GOOD NEWS! Human sa mga panawagan kalakip ang paggamit sa social media, nagkadaghan ang mga taga Davao del Norte nga misanong nga magpabakuna.
Kini ang obserbasyon ni Dr. Jesse Belga, ang Kapalong Hospital Zone head alang sa San Isidro, Kapalong, Asuncion, Talaingod (SIKAT) cluster ug Dr. Catherine Varela sa Island Garden City of Samal (IGACOS) Hospital Zone nga gilangkoban og 46 ka barangays.
“Medyo daghan ang nagpabakuna. Ugma mag-start sa LGU ang Johnson & Johnson vaccine and again nanobra ang nagapalista. Sa una duna pa’y sobra sa bakuna pero karon daghan nag-ilogay na,” matod ni Dr Belga atol sa turnover sa Patient Transport Vehicle Hulyo 29 diin ang Kapalong Zone mao ang usa sa mga benepisyaryo nga gikalipay sab pag-ayo sa doktor.
“Syempre dako gyod og ikatabang ang dugang sakyanan kay usahay naay time nga ang mga referral walay kasakyan ang atong mga pasyente. Tungod ani nga naa na pod ta’y bag-o so dako kaayo ni’g hinabang nga mahatod nato ang pasyente sa right time ug right place,” dugang ni Dr. Belga.
Positibong sanong sa bakuna sab ang namatikdan ni Dr. Catherine Varela sa IGACOS Hospital.
“Sa sinugdanan naay dili gyod pero tungod adtong daghan na ang nag-positive, even ang mga nag-positive after nga naka-recover sila apurado na gyod sila mopabakuna,” pagsaysay ni Dr. Varela sa presente nga response sa taga syudad-isla nga nagpasabot sa kaimportante sa bakuna.
“Ang gobyerno nato naningkamot gyod. Take the opportunity kung naa ang bakuna, dili bitaw nga magpapugos pa. . So any vaccine is a good one. Maski unsa basta naay bakuna kay maskin og magka COVID kay di man gyod na siya 100%, naa man gihapon ta’y possibility nga magka-COVID pero ang effect sa COVID ug bakunado ta layo ra siya kung walay bakuna. Ang gipasalig nila, ang severe kung naa man, bihira lang gyod kung bakunado, kay sa karon ang miabot og severe walay bakuna pa gyod,” dugang pasabot sa IGACOS hospital head nga nagtug-an nga sa unang pangbakuna naglisod gyod sila kay dili motungha nga kinahanglan pa nga mangita na pod ug lain nga bakunahan.
Kagahapon Hulyo 28, gipalanog pag-usab ni Dr. Eleanor Salva, ang DavNor Provincial Vaccination Operation Center Head ang iyang panawagan alang sa pagpabakuna atol sa gipahigayon nga Resbakuna sa Sto Niño, Talaingod. Bisan ang uban wala pa gyod mosanong apan namatikdan sa Municipal Health Officer Dr. Zenaida Adlaon nga mi-triple ang gidaghanon sa mga tawo nga andam na magpabakuna nga gipangunahan sa mga sakop sa 56 Infantry Batallion.
Ang tanang magkasakit sa COVID-19 pulos covered sa zero-billing sa tulo ka DavNor probinsyal hospital sa Kapalong, Carmen ug IGACOS lakip na sa DRMC sa Tagum City.
***************///
