Nakadawat og tag-usa ka Patient Transport Vehicle ang Probinsyal nga Ospital sa Davao del Norte Kapalong ug Samal Zones balor P1.7 milyones matag sakyanan gikan sa Department of Health karong adlawa.
Sumala ni Dr. Jessie T. Belga, Chief of Hospital II sa Kapalong Zone nga kini na ang ikatulong sakyanan nga nadawat sa maong ospital kinsa bag-ohay pa lamang nakadawat og ambulansya niadtong Disyembre 2020.
“Usahay naay mga time nga dungan atong referrals nga walay kasakyan atong mga pasyente, tungod aning naa na pud tay bag-o, dako gyud kaayo’g hinabang nga mahatud nato atong pasyente sa right time,” pasalamat ni Dr. Belga samtang nagbutyag sa tinuod nga sitwasyon sa isolation facility sa Kapalong.
Dugang sa doktor nga bisa’g wala pa naabot ang Delta variant nga Covid-19 sa nasangpit nga lungsod, pirme puno ang pasilidad. 25 ka pasyente lang ang kapasidad niini, apan usahay molapas og 30 ang mga pasyente.
Susamang kahimtang ang nahitabo sa Samal District Hospital. 15 ra ka pasyente ang kapasidad sa isolation facility sa ospital pero sa karon, niabot na’g 20 ka pasyente ang ginaatiman.
Matud ni Dra. Catherine M. Valera, Chief of Hospital I sa Samal Zone aron ma-accommodate ang gadagsa nga mga pasyente, giconvert nila ang karaang resuscitation area sa ospital ngadto sa tulo (3) ka rooms alang sa covid isolation. Ang ubang nakarekober na pero kinahanglan pang i-quarantine gibalhin ngadto sa Temporary Treatment and Monitoring Facilities (TTMF) sa LGU.
Nanawagan ang duha ka doktor sa ilang mga ginsakopan nga mag-amping kanunay, mosunod sa minimum public health standards ug magpabakuna.
Asoy sa duha ka chiefs of hospital nga daghan na ang apurado magpabakuna kung itandi sauna. Nanobra na matud pa ang nagpalista kaysa sa available nga bakuna.
“So far, ang gobyerno naningkamot gyud. Daghan man ang mangabot. Ang ato na lang gyung giingon sa mga tao, kung naa ang bakuna, di na magpapugos. Kay kung ilaha na untang panahon bakunahan, tapos dili sila. So mangita na pud og lain. Any vaccine is a good one,” pagpasabot ni Dr. Valera sa mga nagpaabot maturokan tungod kay nihit ang vaccine.
Gibutyag ni Provincial Economic Enterprise and Development Officer Dennis B. Devilleres nga duna pay umalabot nga mga sakyanan ang tulo ka mga District Hospitals sa probinsya. Kini subay sa kasamtangang pagtutok sa probinsyal nga panggamhanan sa programa sa panlawas ug agrikultura.
“Duna tay umalabot nga mas daghan pa gyud tungod sa funds nga gikan sa DILG. In fact, apil didto ang duha kabuok mobile hospital nga dagko kaayo. Ug kadtong mga sophisticated nga 4x4 Patient Trasport Vehicle ug ambulance. So dili lang ni maoy katapusan,” panapos sa PEEDO head.
