Gikinahanglan ang regular nga panagtagbo tali sa Technical Working Group (TWG) sa KAwsa sa AGrikulturA ug PAnginabuhian sa barangaY (KAAGAPAY), Liaison Officers (LOs) ug mga KAAGAPAY staffs nga atua sa field aron mahatagan solusyon ang mga isyus nga masugatan diha sa komunidad.

Ang KAAGAPAY maoy food-sufficiency program sa administrasyon ni Gobernador Edwin “Kuya Gob” Jubahib aron masagubang ang kalisod ug kanihit sa pagkaon gumikan sa COVID-19 pandemic. Ang programa naglakip sa pagpananom og gulay, pagtanom og kahoy ug pagbuhi og manok.

Gikan sa pag-andam sa mga dokumentos nga kinahanglanon pagporma sa People’s Organization, paghimo sa kulongan sa manok nga kinahanglan i-validate, paghatod sa mga KAAGAPAY chickens ug hangtod na sa pag-harvest anaa ang mga KAAGAPAY staff nga maoy nag-atubang sa mga isyus ug problema nga kinahanglan masulbad aron hapsay ug mahan-ay pag-ayo ang pagpadagan sa programa.