Gipalanog ni Mayor Allan Rellon ang panawagan sa kagamhanan sa siyudad sa Tagum aron ibulag na ang lalawigan sa Davao del Norte sa prangkisa sa Northern Davao Electric Cooperative (Nordeco).
“Nanawagan kami nga… ilahi na ang Davao del Norte para maka-focus mi and the Davao del Norte leaders and community ug katawhan hatagan na ug opportunity na mu-decide whether we will form a separate electric cooperative in the province, or we will opt for the entry of a private company,” sulti sa mayor sa pakighinabi kaniya sa PTV-DavNor.
Butyag sa mayor nga mipasa na og resolusyon ang Sangguniang Panlungsod sa Tagum City, aron ihatag na sa Nordeco, nga kanhi Davao del Norte Electric Cooperative (Daneco), ang probinsya sa laing distribution utility.
Bunga kini, matud sa mayor, sa konsultasyon nga ilang gihimo, diin gipahungaw sa katawhan ang ilang reklamo sa dugay nang problema sa sige’ng brownout, taas nga singil sa kuryente ug hinay nga pag-aksiyon sa Nordeco sa mga tawag sa konsumante.
Ang gipasa nga resolusyon agi’g suporta sa kampanya ni Governor Edwin “Kuya Gob” Jubahib aron ibalhin na ang unang distrito sa probinsiya sa Davao del Norte, apil ang Samal, sa laing service provider tungud sa dugay nang mulo sa katawhan sa way ayo nga serbisyo sa Nordeco.
“We joined the move sa atoang provincial government, through our very own Governor Edwin Jubahib. We are one with the province of Davao del Norte, being a component city, in this call. The overall (goal) niini ang kaayuhan sa katawhan gyud, labi na sa ekonomiya sa atoang lugar,” dugang ni Rellon.
Ingon sa mayor nga daghan nang mga investors ang miatras ug naalanganin pagbutang sa ilang negosyo sa dakbayan tungud sa kakulang sa suplay sa kuryente.
Dako ang pagtoo ni Rellon nga mosutoy ang kalamboan sa dakbayan kung masolbad na ang problema sa sugang dagitabnon.
Saysay pa niya nga wala nagkulang ang city government sa pagtabang sa Nordeco, sanglit sa ilawom sa iyang administrasyon kapin libo na ka mga poste sa kuryente ang ilang gi-fabricate ug giinstalar.
Dugang niya nga pabor jud siya sa pagsulod sa private power company basta masolbad lang jud ang pila ka tuig nang yangongo sa katawhan alang sa saktong kuryente.
“Open mi kung asa’y best diha. Kung best sa private company we will go there, basta ang resulta niya mas mumubo ang bayrunon, mas paspas, mas efficient ang services,” pagtapos sa mayor.
Una nang nanawagan si Mayor Al David Uy sa Samal sa Nordeco nga ihatag na nila ang prangkisa sa kuryente sa isla ngadto sa Davao Light and Power Company (DLPC), tungud kay nakaapekto kaayo ang way ayo nga serbisyo sa kuryente sa industriya sa turismo sa isla.
