Pormal nga gi-turn-over sa gobyerno ngadto sa mga tribong Ata-Manobo ang 68 ka desenteng mga balay didto sa Sitio Tibucag, Dagohoy, Talaingod, Davao del Norte.
Gipangunahan nila Defense Secretary Delfin Lorenzana, Presidential Peace Adviser Sec. Carlito G. Galvez, Jr. ug Governor Edwin "Kuya Gob" Jubahib ang paglusad sa maong proyekto.
Gitagana ang proyekto alang sa mga IPs nga dugay nakulong sa UCCP-Haran sa Davao City. Apil sab sa makabenepisyo ang mga tribu nga nawad-an og panimalay tungod sa kagubot tali sa gobyerno ug mga rebeldeng New People's Army (NPA).
Gipunduhan sa Office of the Presidential Adviser on Peace Process (OPAPP) ang proyekto nga nagkantidad og P17.25 million, diin apil niini ang counterpart sa Probinsiya nga P6 million.
Usa sa natagaan og balay si Datu Ginamao Andil, nga mibalik sa sabakan sa gobyerno human ang unom ka tuig nga pagtago sa Haran.
Sa gikataho, miapil ang datu sa armadong pakigbisog sa NPA niadtong 2002, ug human ang 12 ka tuig, mipuyo na siya sa Haran kauban ang iyang pamilya.
“Mapasalamaton kita sa mga kapulisan ug kasundalohan, labi na kay Kuya Gob Jubahib nga nagtan-aw sa kahimtang sa katawhan,” sulti sa datu, dungan sa pagpangayo’g dispensa sa iyang sayop nga nahimo.
Gipasalig ni Andil nga maningkamot siya aron mapabalik na sa ilang tagsa-tagsa ka komunidad ang pipila ka pamilyang IPs nga nabilin pa sa Haran.
Gi-amin ni Sec. Galvez nga nahimo siyang “emotional” sa paggawas ni Andil sa Haran.
“Datu Andil, maraming-maraming salamat at tayo’y nagbalik… Very emotional ako kasi sa peace process kailangan magtinabangay ta. Lahat mag-igsoonay. Dapat magmahalan tayo,” ingon sa opisyal.
Gipahingusgan ni Kuya Gob nga dili solusyon ang pakigbatok sa gobyerno.
“Dili ang Haran ang solusyon… dili giyera ang solusyon. Ang tinuod nga solusyon para sa pag-asenso sa inyong kinabuhi mao nga ugmaron ninyo ang inyong mga yutang kabilin,” sulti sa gobernador.
Samtang iyang gipasalig ang tabang sa gobyerno alang sa ilang panginabuhi, gihatagan niya'g hibug-aton nga ang matag-usa dunay obligasyon nga maningkamot.
“Gikinahanglan nga maningkamot ang matag-usa kaninyo… Walay mausab sa inyong kinabuhi kung maglingkod lang mo intero adlaw. Gikinahanglan motrabaho mo ug ang inyong mga anak atong paeskwelahon,” sulti sa gobernador.
Gihangyo sab ni Sec. Lorenzana ang mga IPs nga dili ibaligya ang ilang yutang kabilin aron duna silay “ibilin sa inyong mga anak ug mga kaapohan”.
Iya pud gidasig ang mga batan-ong tribo nga mosulod sa pagkasundalo kay tagaan sila’g pribilihiyo nga dili mosubay sa ubang rekisitos, sama sa katas-on.
Miduyog sab sa maong okasyon sila Eastern Mindanao Command Commander LtGen. Greg Almerol, OPAPP Asec. Andres Aguinaldo, Jr., PNP-XI Deputy Regional Director for Operations PCol. Edgar Allan Okubo, OPAPP-Eastern Mindanao Area Manager Oliver Binansilan, Mayor Jonie Libayao, mga provincial department heads sa panguna ni Provincial Administrator Engr. Josie Jean Rabanos, ug uban pang opisyales.
