Gipahayag ni Mayor Ma. Theresa Timbol sa Kapalong nga apektado pag-ayo ang kalamboan sa iyang lungsod tungod sa dili maayong serbisyo nga ginahatag sa Northern Davao Electric Cooperative (NORDECO), Inc.
“Problema kaayo. Pati ang development nato ma-hinder siya. Imbis naa tay mga negosyante, malooy mi kay dili nato mahatag ang ensakto jud nga kailangan nila nga kuryente,” sulti sa mayora sa pakighinabi kaniya sa PTV-DavNor 48.
Gireklamo sa mayora ang sige’ng brownout, taas nga singil sa kuryente ug dugay nga pag-aksiyon sa Nordeco sa ilang hangyo nga linya sa sugang daguitabnon alang sa mga lagyong sityo sa Kapalong.
“Pila ka tuig na nga problema namo nga kalit lang brownout pila ka oras,” sumbong niya.
Gikasubo sab niya ang duha ka tuig na nga pagkadelatar sa sitio electrification program ni Congressman Alvarez sa mga sitio sa Barangay Gupitan kay wa giasikaso sa Nordeco.
Apektado pud, matud niya, ang pipila ka mga proyekto sa munisipyo, labi na kadtong nagkinahanglan og ‘transformer’ aron magamit, sama sa water system.
Saysay niya nga sila na gani mismo ang nipalit sa transformer pero wa gihapon magamit kay dugay kaayo i-calibrate sa Nordeco.
“We deprive the people sa saktong serbisyo... In fact, lima pa ka mga water systems ang hagbay ra nahuman pero dili magamit sa katawhan tungud kay dili mapadaganan sa kuryente,” butyag niya.
Gani, gisaysay ni Timbol nga kaduha na ka beses nga nahimong national finalist sa Most Business-Friendly Municipality ang lungsod sa Kapalong.
Pero, pagtoo niya nga ang dakong rason ngano dili jud sila makadaog kay tungod sa problema sa kuryente nga dili nila ikahimakak.
Usa si Timbol sa unom ka mga mayor, kinsang LGUs ang ubos sa prankisa sa Nordeco, nga misuporta sa kampanya ni Governor Edwin “Kuya Gob” Jubahib ug mipirma sa petition aron ihatag na sa Nordeco sa laing power distribution utility ang Davao del Norte.
Isog nga gipangunahan ni Kuya Gob ang panawagan nga ilisan na ang Nordeco tungod sa dugay na nga yangongo sa katawhan sa dili maayong supply sa kuryente ug sa kamahal sa singil niini nga nahimong babag sa paspas nga paglambo sa probinsya.
Nagpasalamat ang si Mayor Timbol sa gihimong lakang sa gobernador aron mabalhin na ang mga LGU sa unang distrito sa Davao del Norte, apil ang Samal, ngadto sa bag-ong service provider sa kuryente.
“Dako ang among pasalamat sa inisyatibo sa atong gobernador... Gisuportahan jud namo ni hundred percent... Dugay na ni nga mulo sa katawhan pero wala lang gyu’y nangisog nga magsugod niini,” sulti niya.
