Gitanyag sa Probinsyal nga Panggamhanan sa Davao del Norte ang Psychological First Aid alang sa mga empleyado sa capitolio sa ilang kahimsug sa panghunahuna. Gisugdan kini niaging Hulyo 22 ug 27 ug magdapayon kaduha sa matag bulan.

Bisa’g dunay mga trabaho, dili immune ang mga kawani sa Capitolio sa mga stress ug kabalaka bunga sa pandemya nga nasinati karon. Gani sumala ni Provincial Health Officer Dr. Alfredo Lacerona nga daghang mga empleyado nga nagpakita’g susama nga mga sintomas nga usahay ilang ikatingala kay dili gumikan sa impeksyon sa covid kondili tungod sa stress sa pandemia sa covid-19.

Ingo’g resulta sa gipatuman nga mga quarantine protocols sama sa pagbawal sa pagtapok-tapok sa mga managhigala nga sagad maoy kapahungawan sa mga problema, nalimitahan ang paglihok sa katawhan ug maoy hinungdan nga naburyong ang uban.

Matud ni Provincial Human Resource and Management Officer Edwin Palero nga bisan ang mga kawani sa gobyerno, daghan po’g stress sa trabaho. Dugang niya, taliwala sa pandemya, wala mihunong ang operasyon sa panggamhanan. Gani, mas nidaghan pa ang mga demand gumikan kay gikinahanglan sa sitwasyon.

Dinhi na namugna nga imontar ang usa ka psychological clinic sa Bulwagan ng Karunongan sulod sa Capitol Compound ubos sa pagdumala ni Dra. Rachelle Jan Enojada, ang kasamtangang In-house Psychiatrist sa Luntiang Paraiso Regional Rehabilitation Center.

Apan luyo sa maayong tumong, duna gihapoy gibati’g kahadlok sa pagpartisipar tungod sa stigma may kalambigitan sa mental nga balatian.

Gibutyag ni Palero nga dili kahuyang ang magpatabang sa mga propesyonal labi na sa panahon sa grabeng kalisud. Dili pasabot, dugang niya, nga kung magpahiling sa usa ka psychiatrist, dunay daut sa imo. Usa lamang kini ka giya aron matabangan sa hustong buhaton.

Nag-awhag karon si Dra. Enojada sa mga empleyado sa capitolio nga pahimuslan ang libreng programa aron mas masiguro ang kahimsug ug kaepektibo sa mga trabahante. Abli ang klinika sugod alas otso sa buntag karong adlawa, Agosto 19, diha sa Bulwagan ng Karunongan. Mahimong mokontak sa PHRMO alang sa paghan-ay sa inyong iskedyul. Pangitaa lang si Ms. Michelle Claridad, ang Human Resource Development Division Head sa PHRMO.

 

 

 

DavNor News