HALOS DILI MATAPOS ANG PAGPASALAMAT samtang nagsugwak sa kalipay ang gibati sa mga Indigenous People (Ata-Manobo) dihang pormal nga gihatag ang usa ka gatos Balay Pig Imim’Manan (Balay Gipangandoy) aron mahimong ilang pinuy-anan didto sa Sitio Mesolong, Sto. Niño, Talaingod, Agosto 20, 2021.

Sa paningkamot sa administrasyon ni Gobernador Edwin “Kuya Gob” Jubahib, nakasungkit kini og daghang pabalay nga mga proyekto gikan sa National Housing Authority ug ubang nasyonal ahensya sama sa Office of the Presidential Adviser on Peace Process (OPAPP) para sa mga IPs ug niadtong apektado sa gyera sa teroristang komunista dili lang sa lungsod sa Talaingod lakip na ang para sa Kapalong ug New Corella.

“Nagpasalamat ko kay sa unang panahon wala mi maayong balay pero karon, naa na gyod mi balay nga gi-imim’manan namo sa una pang panahon. Gusto namo nga makabaton kana nga balay kay sa una man gong panahon magsige mi’g balhin-balhin; dili magdugay among balay kay walay ensakto nga mga haligi, ang bungbong kawayan unya ang atop cogon. Mao nang dako kaayo nakong pasalamat sa Ginoo nga naa na’y mga tawo nga naglingkod sa goberno nga nakakita sa amoang mga Lumad dinhi sa Talaingod. Dako gyod kaayo akong pasalamat nga naka-angkon ko ug balay. Dako gyod kaayo ang akong pasalamat ipaabot kang Governor Kuya Jubahib nga sa iyang gugma sa amoang mga tribo. . Mao nang dako gyod kaayo ang akong pasalamat sa ilaha nga naghatag sa ing-ana nga kantidad. Dako kaayo sila’g gugma sa amoa mga tribo dinhi sa Talaingod. . Dako kaayo akong pasalamat,” matod ni Bae Sibiano Nicolas.

Ang matag balay nga hinimo sa kahoy og coloroof ang atop, dunay kaugalingong CR nga makatabang ma-mentinar ang kahinlo.

“Among atimanon. Para sa akoa atimanon gyod nako ang balay nga dakong panalangin gikan sa Diyos pinaagi kang Governor ug kang Sir Marcelino Escalada. Pinaagi sa iyaha nakaabot sa amoa ang dako kaayong panalangin sa tribo ug sa mga Lumad,” padayong pasalamat sa Bae nga mao sab ang nag “oranda” (awit pasalamat sa tribo).

Si Kuya Gob nga wala makauli gumikan sa usab-usab nga biyahe gikan sa Manila gi-representahan ni Provincial Administrator Engr. Josie Jean Rabanoz nga naghatod sa mensahe sa gobernador.

“Nakadungog namo ana ni Kuya, wala pa gani siya nagsugod, nangampanya pa siya, “change is coming,” ang kabag-ohan moabot dire sa probinsya sa Davao del Norte. Ug sa duha pa lang ka tuig niya, dako na atong nakita nga kabag-ohan. . dako kaayo natong pasalamat sa national government, kang Presidente Rodrigo Roa Duterte nga gitabangan niya si Kuya Gob, nga ang probinsya sa Davao del Norte pinaagi sa mga national agencies sama sa National Housing Authority nga nagbubô dire sa atoa og mga pondo para itukod sa mga balay para sa atong mga igsoon nga mga Lumad. . Dakong kalipay ni Kuya Gob nga makit-an nga ma-improve ang mga puy-anan sa atong kaigsoonan nga Lumad,” mensahe ni Kuya Gob pinaagi ni PA Rabanoz.

“Pasalamat mi sa inyoha nga naa na mi balay, gwapo, makapuyo na mi. Among atimanon, dili maghugaw-hugaw, dili magsagbot, maghimo mi’g basurahan kay gwapo naman among balay,” pasalamat sab ni Clarita Piadol, usa sa 100 nga benepisyaryo.

Gawas sa Sitio Mesolong, ang ubang proyekto pabalay makita sab sa Sitio Nasilaban, Sitio Gatong ug Sitio Cuyas gawas pa sa ubang lungsod sa DavNor. [noyg//photos: jnald]

************///