MAKALAUM sa padayong suporta sa National Housing Authority (NHA) ang probinsyal nga panggamhanan sa Davao del Norte sa pagpanguna ni Gobernador Edwin “Kuya Gob” Jubahib labot sa “Pabahay sa Tribu” nga mga proyekto kay pasado kini sa “standards” sa ahensya.
Kahinumduman nga niadtong Enero 27, 2020, gisugdan ang tulo ka dagkong proyektong pabalay para sa mga IPs sa Sitio Gatong, Sitio Nasilaban ug Sitio Mesolong dinhi duha niini nakumpleto na. Kasamtangan nagpadayon ang pagtukod sa 100 ka yunit didto sa Sitio Nasilaban samtang ang ubang pabalay diha sa laing Sitios sa Talaingod ug sa ubang lungsod nagpadayon.
“Isa sa mga standards ginatan-aw nato, kung naa ba’y capacity ang usa ka LGU. The factors are naa ba siya’y functional Local Housing Board, naa ba siya’y Shelter Plan ug naa ba siya’y Technical ug tawag nato Administrative capacity to implement the projects. Nakita nako sa Davao del Norte nga ang tanan nga pondo nga gihatag sa NHA sa Davao del Norte, kay Governor Edwin ug sa uban pa nga mga munisipyo, are all taken cared of. Meaning to say, based on the standards, based on the designs, program of works, maayo ang pagka-implement nila and because of this we will continue to support Davao del Norte,” matod ni NHA General Manager Marcelino Escalada, Jr. nga mapasalamaton sa probinsya sa Davao del Norte atol sa turnover sa 100 ka balay didto sa Sitio Mesolong, Byernes, Agosto 20.
“Ang instructions sa Presidente sa akoa nga tanan nga project nga nasugdan dapat matapos. The only way to do that is close coordination, close engagement with the Local Government Units,” dugang pasabot ni GM Escalada.
Sa report sa kasundalohan, sobra 75% sa nahimong NPA maoy mga IPs ug gusto sa NHA kauban ang Department of National Defense (DND) nga himoong “proactive” ang pagsulbad sa gamot sa pagrebelde nga sosyal inhustisya.
“Kini siya usa ka reactive measure. Ang ginatan-aw namo ni Usec Rey Mapagu (DND) is how can we be proactive nga ang vulnerable sector actually IPs siya. So ang recruitment nahitabo sa IP communities. So didto na lang nato ibubo ang atoang proactive measures and trying to provide housing at the very source, sa level mismo sa mga community,” matod ni Escalada.
Sanglit taga Davao City, sinati si GM Escalada sa mga NPA recruitment nga nagkahitabo sa Southern Mindanao lakip ang Talaingod, Paquibato, Mapula, Davao Oriental ug bisan silingang probinsya sa Surigao del Sur ug Surigao del Norte.
“Ang Presidente nato gusto niya taposon ni tanan. The only way to do that is tan-awon nato ang sinugdanan which is social injustice pag-abot didto sa panimalay,” pagpasiugda sa GM.
Giawhag ni GM Escalada ang matag benepisyaryo nga panggaon ang matag balay nga mobalor ug tig P200K kay bisan dili kini mahal kaayo, apan lahi ra gyod sa ilang naandan nga puy-anan.
“Panggaa ni ninyo. Kung asa ka nagagikan, this is a lot better. So mao ni siya ang pamana, mao ni siya ang pagbabago under the Duterte administration,” panawagan sa NHA General Manager sa mga IPs.
Niadtong Agosto 16 gi-turnover sab ang 68 ka balay didto sa Sitio Tibucag ug atol sa Sitio Mesolong turnover laing P15M ang gitunol sa NHA para sa pabalay sa New Corella IPs.
********************///
