Makita na sa qr code scanners sa mga establisamento sulod sa probinsya sa Davao del Norte ang vaccination info sa DavNor Quick Response (QR) code sugod bulan sa Agosto.
Sa pag-scan sa QR code mahibal-an kung ang usa ka indibidwal nabakunahan na o wala pa. Kung nabakunahan na, masuta usab kung unsang brand sa bakuna ang nadawat ug kapila ka dosis. Samtang ang makita nga detalye sa wala pa maturoki sa bakuna kay “No data found!”.
Kahinumdoman niadtong milabay'ng bulan sa gipost sa One DavNor Network facebook page nga newsflash, dunay netizen nga ni-comment kung pwede maapil sa system ang maong impormasyon. Daling gitubag ni Provincial eGov System Development Manager Edwin Palero ang sugyot nga andam na ang nasangpit nga detalye niadtong tungora ug gahulat na lang sa approval ni Gobernador Edwin “Kuya Gob” Jubahib kung kanus-a ma-upload.
Dugang niya, kining bag-ong feature sa Davao del Norte Covid-19 Information Management System (DCIMS) nahisubay sa nakalatid nga flowchart sa Covid-19 Management sa Department of Health sama sa profiling, contact tracing, monitoring ug vaccination.
“Karon niabot ang bakuna, ato na pud ng nahimoan daan og pamaagi nga ma-integrate pud sa atong scanning kay moabot gyu’ng panahon, mangutana gyud ang mag-manage aning kuan kung kining tawhana nabakunahan na ba o wala. Kritikal kaayo na”, pagsubay ni Palero.
Tanang mga residente nga nagpabakuna sa 11 ka mga LGUs sa lalawigan ug sa tulo ka probinsyal nga ospital nga nagagamit sa DCIMS alang sa registration ug database sa mismong vaccination awtomatik nga ma-update ang detalye sa qr code gawas lang sa mga nakapabakuna sa Davao Regional Medical Center (DRMC) nga dunay lahi nga vaccination database ug nakapabakuna sa laing probinsya sama sa Davao. Apan nakig-alayon na ang DRMC aron ma-integrate ang ilang system sa DCIMS ug sa dili madugay makita na sab sa mga nakapabakuna didto ang ilang vaccination info.
“Tanan nga atong gibakunahan diri sa probinsya, sa LGUs… tanan natong hospitals: Samal, Kapalong ug Carmen… wala lang ang DRMC, pero ongoing na atong integration ron, para sa mga residente sa Davao del Norte nga diri nagpabakuna… sigurado nga makita na gyud”, matud niya.
Sa karon, mogana lamang ang maong feature kung naka-online ang qr scanner. Padayon pang gina-configure ang system aron bisa’g offline, mogana na kini.
Subling giklaro usab sa opisyal nga walay polisiya nga nagdumili sa wala pa nabakunahan nga makasulod sa mga establisamento sanglit makita man sa scanner. Hinuon, gibutyag ni Palero nga dunay mga malls sa Tagum ug Panabo City nga nagatanya’g discounts ug ubang mga prebilihiyo alang sa mga fully vaccinated.
“Naay mga malls diri sa Tagum ug sa Panabo nga naay promotion… Promo is exclusive for fully vaccinated card holders”, pagsaysay ni Palero.
Walay laing tumong ang pag-upgrade sa DCIMS kondili ang makatabang sa pagdali ug pagpatuman sa mga lakang nga makapakusog sa atong hinagiban batok covid-19. Kanunay nga pahimangno sa probinsyal nga panggamhanan ang pagsunod sa maong mga lakang ug kab-oton ang gipaningkamutang herd immunity aron mabalik na sa normal ang atong kahimtang.
