Giandam na sa Kapitolyo ang sweldo sa mga miyembro sa People’s Organizations (POs) nga mipanday sa kulungan sa ilang mga manok, ubos sa KAwsa sa AGrikulturA ug PAnginabuhian sa barangaY (KAAGAPAY) – TUPAD program ni Kuya Gov Edwin I. Jubahib.

Kagahapong adlawa, gitunol ni Provincial Department of Labor and Employment (DOLE) Head Angelina A. Talingting kang Kuya Gob ang kantidad nga P15,003,776, aron maoy ipasweldo sa mga benepisaryo, gikan sa Tulong Panghanap buhay sa Ating Disadvantaged/Displaced Workers (TUPAD) program sa maong ahensiya.

Dunay 3,788 ka mga benefisaryo ang makadawat sa tag-P3,960 sulod sa 10 ka adlaw nga ilang pagtrabaho sa paghimo’g kulungan sa manok. Kini dugang sa ilang nakwarta isip bahin sa halin sa mga manok nga gialima sa ilang tagsa ka POs.

Human ang malampuson nga pagpatuman sa KAAGAPAY Vegetable Production sa milabay nga tuig, gipalapdan ni Kuya Gob ang programa karong tuiga aron iapil ang programa sa panginabuhian, pagpananum og kahoy, ug free-range chicken growership, kauban ang tabang pinansiyal gikan sa DOLE-TUPAD program.

Sa KAAGAPAY reforestation project, dunay 2,600 ka mga recipients ang nakabenepisyo sa unang P10.6 million nga gihatag sa DOLE-TUPAD. Gisundan kini’g release sa P4.7 million alang sa 1,000 ka mga miyembro sa POs nga unang nakahimo sa ilang kulungan sa manok.

Hangtud Agosto 25, 2021, mokabat na ngadto sa P30,434,052 ang nahatag sa DOLE-TUPAD alang sa maong programa ug duna na poy benepisaryo nga 7,685 tanan-tanan.

Gikan sa bulan sa Mayo 2021, kapin 6,000 na ka mga manok ang gitagtag sa Probinsiya sa sobra 100 ka mga POs, nga benepisaryo sa DavNor KAAGAPAY program.

Kuyog ni Talingting sa pagtunol sa kwarta si DavNor Field Office Child Labor Community Facilitator Dave Andrie Villegas. (Kauban sa report ug picture ni Rexle Ariza)

 

 

 

DavNor News