Walay internet ug lagyo pa gyud ang mga balay. Unsaon na lang ang pag-eskwela sa mga bata?

Pipila lamang kini sa mga problema nga giatubang sa mga Municipal Link sa San Isidro hinungdan sa pagkaluya sa mga estudyante sa pagtungha nga sakop sa 4Ps (Pantawid Pamilyang Pilipino Program).

Tungod niini, nagkauyon ang Department of Social Welfare and Development (DSWD) ug ang Department of Education (DepEd) nga dal-on nila ang eskwelahan ngadto sa mga panimalay. Sila na mismo ang nibisita aron sa pagtudlo sa mga bata pinadasig sa bansilag “No one left behind”. Human sa maong lakang, nisaka ang compliance rate sa mga panimalay nga nahimutang sa mga lagyo ug sigpit nga mga lugar.

Usa sa gipakusgan usab nga programa sa MSWD San Isidro ang Men Opposed to VAW Everywhere (MOVE). Kini naglambigit sa mga kalalakin-an aron sila masayod sa katungod sa mga kababayen-an ug kabataan ug sila na usab ang manalipod kanila.

Sa pikas bahin, kamatikdan ang kamadasigon sa usa ka inahan samtang naghatag sa iyang testamento sa kalampusan. Siya si Maribeth Salas, lumolupyo sa Barangay Kipalili sa maong lungsod.

Matud niya nga bisan sa kapait sa ilang kinabuhi, nakapahuman sila sa iyang bana sa duha nila ka mga anak sa kolehiyo. Ang iyang bana usa ka mananggete ug mag-uuma apan buotan ug kugihan.

Kini silang pamilyaha maoy napili nga Huwarang Pamilya niadtong 2018 ug nagmadaugon sa municipal, provincial ug regional level.

Hangtud karon, wala pa masayod si Mrs. Salas kung unsay hinungdan sa ilang pagkadaug basta alang niya, gihimo ra nila ang tanan aron malipay ang iyang pamilya.

Sa maong okasyon, 11 ka pamilya ang migradwet samtang 47 ka pamilya ang nakahuman sa ilang termino isip benepisyaryo.

Pasalig ni Audrie Perez, ang Executive Assistant sa Office of the Congressman and Governor, nga bisa’g naundang ang tabang gikan sa 4Ps ngadto sa mga exiting beneficiaries apan dili mohunong ang gobyerno sa paghatag sa mga serbisyo alang kanila. Abli kanunay ang opisina sa gobernador ug congressman, alang sa ilang panginahanglan.

Andam usab nga moabaga ang lokal nga panggamhanan sa San Isidro kauban ang lokal ug nasyonal nga mga ahensiya sa gobyerno sama sa DOLE, DTI, PESO, PNP ug uban pa.

Duyog sa maong patigayon sila Vice Mayor Baltazar L. Cuyos, Municipal Administrator Allan T. Delideli nga maoy representante ni Mayor Arnel H. Sitoy, MSWD Officer Rosemarie J. Galanto, MAGRO Head Laureano M. Pintor, Jr., SB Member Nancy R. Sitoy, Municipal IPMR Datu Antonio Araulio, Provincial Link Blaissel Jane L. Fernandez, mga municipal/provincial links ug mga sakop sa PNP.

 

 

 

DavNor News