GIPATAS-AN pa gyod ang alokasyon alang sa probinsyal nga administrasyon ni Gobernador Edwin “Kuya Gob” Jubahib gikan sa ubos 10,000 (usahay 5,000) matag semana ngadto 17,000 ug kagahapon lang (Agosto 25), 30,190 doses na gyod ang nadawat klase-klaseng bakuna nga 18,500 Sinovac, 8,190 Pfizer ug 3,500 Moderna vaccines.
Kahinumduman nga niadtong Agosto 12 gipadayag ni DavNor Provincial Health Officer (PHO) Dr. Alfredo Lacerona ang mga rason nganong “kumbinsido” ang DOH Regional Office nga patas-an ang alokasyon sa probinsya--- gumikan sa paspas nga implementasyon sa pagpangbakuna gawas pa sa “kanunay’ng” hangyo ni Gobernador Jubahib sa nasyonal nga kagamhanan ingon man ang “upgraded” Contact Tracing System sa DavNor nga nagpasayon ug nagpadali sa implementasyon.
“Si Gob nagsige na gyod siya’g sulat, sige’g panawag sa national kay nagsige siya’g pangayo og ayuda. Kining atong system, sa whole Davao Region kita lang dire ang naka-electronic. Gani sa atong QR code, sa atong contract tracing mo-appear na diha ang imohang vaccination diin makita dayon sa QR code kung bakunado ba ug unsang klase sa bakuna ang nadawat sa indibiduwal,” ang pahayag sa PHO department head niadtong Agosto 12.
Sa kasamtangan adunay 20 ka mga Vaccination sites gawas pa sa 13 ka mga Satellite sites nga gidumala sa 66 Vaccination teams apil na ang Provincial Health Office nga nagpahigayon ug bakuna sa tibuok Davao del Norte.
Labot sa bag-ong miabot nga mga bakuna, matod ni NIP Provincial Coordinator Neidel Feah Ferido nga nakadawat sila’g instruksyon nga ipauna pag-utilize ang Moderna Vaccine.
”Gahapon nag-pm ‘tong among regional coordinator sa Region na ipaspas, naay order si RD nga ipa-consume tanan ang Moderna sulod hangtod sa August 31. Gahapon pa ni gi-deliver ning Moderna. Gikontak tanang RHU nga ipauna gyod og utilize ang Moderna,” matod ni Ms. Ferido.
Sa gipangutana kung may higayon ba nga “nausik” ang vaccine, matod ni Ferido nga ila gyong gipaningkamotan nga walay masayang gawas sa pipila ka “factory defect” sa Sinovac vaccines kay kulang ang dose.
“Wala pa kay like aning Pfizer, six doses. Ang atong vaccinator dili na siya mo-open kung dili makumpleto ang unom. Kay dapat two hours man lang siya open. Dili parehas ang vaccine; ang uban naay six hours ang uban two hours. Si Pfizer is very delicate so mao nang tapokon gyod nang six anha pa siya mag-open para segurado nga wala siya’y mausik,” pagklaro sa NIP Provincial Coordinator labot sa pagdumala sa mga bakuna.
Naglaom ang DavNor PHO sa pakigtambayayong sa 11 ka LGUs nga ilang makab-ot ang “herd immunity” (70% sa populasyon nga bakunado) pagkahuman ning tuiga ug namatikdan nga nagkadaghan ang gustong magpabakuna ilabina dihang misulod sa Davao del Norte ang Delta variant sa COVID-19.
***********////
