NAGTINABANGAY ang Technical Education Skills Development Authority (TESDA), probinsyal nga panggamhanan sa Davao del Norte, NCIP ug ubang ahensya sa gobyerno alang sa Empowerment for Agri-Responsive and Novice Indigenous People (EARN IP) nga gilusad Agosto 27 didto sa Sitio Uraya, Talaingod.
Benepisyaryo ang 40 ka miembro nga 2019 National and Regional Winner Uraya High-Value Crops Farmers Association sa mga libreng pagbansay gikan sa TESDA ug DavNor dili lang sa dugang kahibalo sa panguma kundili apil niini ang “value-added” trainings aron mokita og dugang ang mga mag-uuma sa gulay.
“Actually nangimbita kita sa mga ahensya sa gobyerno kay dili lang kini TESDA; tambayayong, magtinabangay kita para sa programa sa atong mga IP. Grabe ang suporta sa atong Governor kay ang programa sa atong Governor ang KAAGAPAY, nagpalambo sa atong agrikultura. Number one nga programa nga ginapalambo karon sa atong gobyerno ang agrikultura. Ug tungod sa food security nato kani ginapaluyohan sa atong Governor Edwin Jubahib, naa ang suporta sa atong KAAGAPAY,” matod ni DavNor TESDA Provincial Director Dr. Remegias Timonio.
Kahinumduman nga gumikan sa COVID-19 pandemic, gilusad ni Gobernador Edwin “Kuya Gob” Jubahib ang programang KAwsa sa AGrikulturA ug PAnginabuhian sa barangaY (KAAGAPAY), usa ka food-security program nga kasamtangan nagtutok sa pagpananom og gulay ug kahoy ingon man pagbuhi og manok diin ang probinsyal nga panggamhanan ra sab ang mopalit sa produkto.
Libre ang mga trainings nga himoon sa TESDA sulod sa 29 ka adlaw nga adto himoon sa Sitio Uraya uban ang TESDA National Certification (NC II). Duna sab allowance nga P160 kada adlaw matag partisipante. Libre sab ang mga pagbansay nga himoon sa DavNor.
“Livelihood gyod ni siya, naa gyod ta’y daghang training nga makaayuda sa TESDA. Sa TESDA sila naay agri-related nga mga courses, kita naa pod pero we are more on food. Kung gusto mo magpa-training unsaon paghimo og banana chips, kung magpa-train mo unsaon paghimo’g bukhayo nga lamian, unsaon nato pag-process ug mga karne, unsaon nato pag-value-add sa mga gulay nato nga mga surplus. . . Mao na atong i-proseso, part pod na sa amoa nga pwede ta maghatag og training, meaning to say walay mausik,” matod ni Ms. Maritess Racacho sa DavNor EWDD nga maoy nagdala sa mensahe ni Kuya Gob.
“Magtinabangay ta; magtabang si TESDA, magtabang si agriculture, magtabang si NCIP, of course magtabang ang tanang LGUs. . Dili man ta modato pero at least mahayahay ang atong panginabuhian nga dili gyod ta kaingon nga dili ta kakaon,” dugang ni Ms. Racacho.
Mipasalig ang TESDA Provincial Director nga dili gyod biyaan ang mga IPs paghuman sa training hinuon ipahimutang ang “tabo” (market day) matag semana nga suportahan pinaagi sa pagtungas aron lang mamalit sa ilang produkto.
“Dili mo biyaan hangtod maabot nga pwede na kamo magsarili. Dili mo biyaan hangtod nga mobarog nga independent. . So mao na ang atong programa EARN IP in response to food security. Manghinaut kita nga molampos kini. . Nagpaluyo kita para sa inyo, sa atong tanan, para sa tibuok Pilipinas. . . Ato hunongon ang gyera sa kapobrehon,” matod ni PD Timonio.
Atol sa paglusad sa EARN IP gipaabot sa TESDA Damayan Community pantry ang mga regalo para sa mga IPs.
***************///
