MITUNOL na sab ang Department of Labor and Employment (DOLE) kantidad P450,000 mga galamiton sa panguma, sprayer, binhi sa mais, abaca (sucker), fertilizers ug daghan pa ngadto sa ginikanan sa 15 menor-de-edad nga IPs nga na-rescue gikan sa Cebu City.

Sayo niining semanaha, gidawat sab sa mga ginikanan ang tig P6,000 ingong “payout” sa paglimpyo sa ilang uma nga tanoman.

“Ubay-ubay na gyod ang assistance nga among gihatag, naa ta’y six thousand and this is worth thirty thousand. . Ang among pangayoon is tarungon nato ni og amping nga molambo uban sa support sa atong tanang mga partners. . Hangtod kanus-a ang among assistance sa inyoha, mora’g dili na namo na madungagan kay naa ta’y limitations. . Pahimuslan ninyo ang higayon nga naka-avail mo ani nga livelihood kay dili tanang higayon moabot ni sa inyoha,”mensahe ni DOLE DavNor Provincial Director Angelina Talingting ngadto sa IP nga mga ginikanan.

Apil sa ilang nadawat ang isa ka sakong bugas ingong “balon” aron dunay magamit samtang nagtrabaho.

“Ug naa pa gyod mo balon nga isa ka sakong bugas so naa mo’y kaonon sa pagpananom. Unta mabuhi ni tanang abaca. Naay mga fertilizer, mga equipment, so wa na gyod mo’y pangitaon. Unta ibutang ninyo sa inyong isipan, sa inyong kasingkasing kani nga higayon kay dili tanan adlaw naay mohatag sa inyoha. Tarungon ni para i-support ninyo sa inyong mga anak aron makapadayon og eskuyla,” dugang sa DOLE Provincial Director.

Si Botigon Mandacawan nga may 17 ug 15 anyos anak na-rescue todo pasalamat sa gihimo ni Gobernador Edwin “Kuya Gob” Jubahib ug sa tanang ahensya nga mitabang kanila. Pinaagi sa interpreter iyang gipahayag ang iyang gibati.

“Pasalamat gyod nga natabangan ug naaksyonan nga makuha gyod ang ilang mga anak. . Nalipay sila sa pagtabang ni Gob, tanan nga nitabang nga kini magamit nila nga maangat gamay sa ilang gipanghatag,” matod ni Mandacawan pinaagi sa tighubad nga si Lorena Bangoy, ang house-parent nga nag-atiman sa 15 gi-rescue nga mga kabataan.

Misaad sab si Mandacawan nga ilang ampingan og itanom gyod ang mga gihatag sa gobyerno kay makatabang sa ilahang kalisod. Dugang misaad nga dili na gyod sila magpailad kay nakaila na sila sa tinuod nga gobyerno.

“Bisag unsa pa’y mahitabo, bisag kinsa pa’y moabot dili na gyod sila mailad. Kini karon ang ilang natutokan ang tabang sa gobyerno nga gipaningkamotan gyod sila nga kuhaon, nga gitabangan gyod sila,” dugang paghubad ni Lorena sa Ata-Manobo nga sinultihan.

Gipaabot ni Executive Assistant Anselmo Junio ang mensahe ni Kuya Gob nga nag-awhag sa mga benepisyaryo nga molihok sab para sa ilang panginahanglan bisan pa sa tabang sa gobyerno.

“Mao ni ang programa sa atong Gobernador, si Kuya Gob, nga kinatibuk-an ang tabang dili lang kay ingon nga motabang unya mawala na. Unang gitabangan ang inyong mga anak. Sakripisyo ni Kuya Gob didto pa lang sa Haran unya hangtod didto sa Cebu. Si Kuya Gob gyod ang nangunay. Through the agencies sa DOLE mas mahatagan sa malangkobon nga pagtabang. Kini nga tabang dili lang ni nga igo ra ta nga mokab-ot sa kamot kundili tabang kini nga atong iduot pinaagi sa atong paglihok,” matod ni Executive Assistant Junio.

Gikan sa ilang pagka-rescue sa Cebu niadtong Pebrero, ang 15 ka menor-de-edad giatiman sa probinsyal nga panggamhanan ni Gobernador Jubahib pinaagi sa PSWDO gikan sa ilang pagkaon, edukasyon ug ubang mga panginahanglan.