Kuyog ang mga dagkong opisyales sa Civil Service Commission, gipasindunggan ni Governor Edwin “Kuya Gob” Jubahib ang mga kawani sa gobyerno sa ilang kakugi ug pagbarog sa ilang mga katungdanan luyo sa pandemya.

“Kauban nato ang atong mga kugihan ug isog nga mga kawani sa atong pag-atubang sa krisis… atong ginapasidunggan ang (ilang) padayong lig-on nga pagpamuhat aron atong mahatud ang nag-unang panginahanglanon sa katawhan,” sulti ni Kuya Gob, atul sa virtual opening sa 121st Philippine Civil Service Anniversary sa probinsya.

Gipasalamatan sa gobernador ang mga kawani sa ilang makanunayong suporta sa mga polisiya, programa ug proyekto sa iyang administrasyon, nga nagtumong sa kaayuhan ug kalamboan sa katawhan, apil ang mga lakang aron mapugngan ang pagkuyanap sa Covid-19 sa lalawigan.

Lakip niini ang mga inobasyon, sama sa DavNor Covid-19 Contact Tracing System, pagpatukod sa daghang isolation centers ug paglusad sa DavNor KAAGAPAY program, aron masiguro ang sakto nga supply sa pagkaon ug panginabuhian sa katawhan.

“Our calling as civil servants compels us to selflessly serve our people, country, and God above self. We are called to be servant heroes (Gitawag kita aron mosilbi sa katawhan, sa nasud ug sa Guino, labaw sa atong kaugalingon. Kita mga bayaning sulugoon),” sulti niya.

Misaludo sab sa mga kawani si Civil Service Commission (CSC) Chair Alicia dela Rosa-Bala, sa ilang pagpadayon sa pagpangalagad, bisan sa kakuyaw sa panahon karon.

“We salute you and thank you for your commitment to duty and sacrifice,” ingon niya.

Gilusad sab sa CSC ang pulo ka tuig nga tema: “Transforming Public Service in the Next Decade: Honing Agile and Future-Ready Servant Heroes,” nga matud ni dela Rosa-Bala nagasalamin sa mga kalampusan sa serbisyo sibil, labi na sa strategic human resource reforms ug sa mga trabaho sa unahan ubos sa “new normal”.

Kauban sab sa mitimbaya ug midayeg sa mga kawani sila CSC-XI Regional Director Adams Torres ug CSC Provincial Director Nancy Tuason.