Nakadayeg si Philippine National Police (PNP) Chief Police General Guillermo Eleazar sa mga inisyatibo ni Governor Edwin “Kuya Gob” Jubahib agi’g suporta sa kampanya sa gobyerno alang kalinaw.
Sa pagbisita niya sa opisina sa gobernador sa Kapitolyo ganinang hapon, kanunay ang pagtando sa pag-uyon sa Police General samtang gisaysay ni Regional Police Office (RPO)-XI Chief BGen. Filmore Escobal ang mga nabuhat ni Kuya Gob, sa pagpatuman sa programa sa gobyerno nga ending local communist armed conflict (ELCAC).
“Ok ah. Mabuti. Maganda,” balik-balik nga sulti sabay pagyango ni Eleazar, nga maoy nadunggan sa mga anaa sa buhatan sa gobernador.
Lakip sa mga inisyatibo ni Kuya Gob nga gibida ni Escobal sa PNP Chief ang pagpasa niini sa resolusyon sa Regional Peace and Order Council (RPOC)-XI aron ideklarar ang Communist Party of the Philippines-New People's Army-National Democratic Front (CPP-NPA-NDF), isip usa ka “organized crime group” ug ang resolusyon aron ipasara ang UCCP-Haran, nga dugay’ng mibihag ug mipahimulos sa gatosan ka mga Indigenous People (IPs).
Ang duha ka mga resolusyon gi-aprobahan sa RPOC-XI diha-diha dayon sa regular meeting niini niadtong Enero 2020.
Apil sab sa gitaho ni Escobal nga nahimo ni Kuya Gob ang pagpasurender ni kanhi rebel leader Datu Guibang Apuga; pag-rescue sa mga tribu sa Haran ug pagtukod og balay alang kanila, apil ang pagpatindog sa kapin 400 ka mga pabalay sa mga tribu sa lagyong kabukiran; pagpatuman sa DavNor KAAGAPAY program nga nakataba’g dako aron mokita ang mga IPs; ang makanunayong tabang sa gobernador sa kapulisan, labi na sa mga miyembro sa Revitalized Police sa Barangay (RPSB), ug uban pa.
Kauban sab sa hepe sa nasudnong kapulisan sila PMGen. Manuel Abu, RPO-XI Deputy Regional Director for Operations PCol. Edgar Allan Okubo, ug DNPPO Chief PCol. Ranie Hachuela.
Gikan si Eleazar sa iyang Command Visit sa Davao del Norte Police Provincial Office (DNPPO), diin iyang gipangulohan ang pagpanumpa sa mga opisyales ug miyembro sa Lingkod Bayan Advocacy Support Groups and Task Force Multipliers, nga mibulontaryo pagtabang sa kapulisan sa pagbantay sa kahapsay og kalinaw.
Sulti sa Chief PNP nga gawas sa padayong “capability-building” sa organisasyon sa PNP, mahinungdanon kaayo ang suporta sa LGUs sa pagpalihok ug paglig-on sa kooperasyon sa mga nagkadaiyang sektor sa pagpanday og kalinaw sa katilingban.
“Nagpapasalamat ako... sa suporta ng ating mga local government units, na nakita natin sa ating mga local chief executives na binibigay sa ating mga police stations sa area at ganun din sa tulong ng ating mga advocacy support groups and force multipliers,” sulti niya.
Samtang iyang gidayeg ang pagka-disiplinado ug pagkalimpiyado sa mga kawani ug estasyon sa pulisya ilawom sa DNPPO, gidasig ni Eleazar ang mga pulis sa probinsya aron sa padayong pagsuporta kaniya sa iyang kampanya sa pagwagtang sa mga ‘police scalawags’, nga maoy nakamantsa sa maayong imahe sa nasudnong kapulisan. Nobags
Gisaysay ni RPO-XI Chief BGen. Filmore Escobal, wala, kang PNP Chief Police General Guillermo Lorenzo Eleazar, too, ang mga nahimo ni Kuya Gob Edwin Jubahib, agi'g suporta sa programang ending local communist armed conflict (ELCAC).
Gipasalamatan ni PNP Chief Police General Guillermo Lorenzo Eleazar si Kuya Gob Edwin Jubahib sa iyang dakong suporta sa kampanya sa gobyerno alang kalinaw ug kahapsay.
Gipahingusgan ni PNP Chief Police General Guillermo Lorenzo Eleazar ang iyang kampanya aron wagtangon ang corrupt nga mga pulis sa organisasyon sa Philippine National Police (PNP).
Gipangunahan ni PNP Chief Police General Guillermo Lorenzo Eleazar ang pagpanumpa sa mga opisyales ug miyembro sa Lingkod Bayan Advocacy Support Group ang Multiplier Force.
