GITAMBAGAN ang mga miembro sa lain-laing Peoples’ Organizations (POs) nga dili lang palamboon kundili “padakoon” pa ang ilang nadawat nga proyekto sa KAwsa sa AGrikulturA ug PAnginabuhian sa barangay, kun KAAGAPAY nga programa gikan sa administrasyon ni Gobernador Edwin “Kuya Gob” Jubahib.

Nga naghatod sa mensahe-tambag ni Kuya Gob ngadto sa taga Braulio E. Dujali, matod ni Executive Assistant Newell de Ramos nga sanglit “segurado” na ang ganansya sa mga POs gumikan kay libre ang mga manok nga dunay pakapin nga feeds sa first cycle dispersal, ilang gamiton sa maalamon nga paagi ang ilang kita pinaagi sa pagtinda og bugas ingon man feeds parehas sa mga POs sa barangay Ising, Carmen.

“Sa mga beneficiaries nga nakadawat og P3,960, wala nila gihurot pag-takeout nga giuli sa ilahang balay. Nagbutang sila og tig P2,000 . . sa ilang asosasyon. Nagsabot ang Barangay Ising. Dunay siyam ka People’s Organization nga naghimo sila’g tindahan; KAAGAPAY Bigasan, sanglit kitang tanan tao mokaon ma’g bugas, nagapamalit og bugas. Unya kining feeds nga component sa atong manokan, kung mahurot na kay dili man na siya igo hangtod modako ma-harvest ang inyong manok, nagapalit sila og feeds. . . Imbes mopalit sa ubang tindahan, mopalit na lang sila sa ilahang asosasyon kun diin naka-extra income pa ang maong asosasyon,” matod ni Executive Assistant de Ramos ngadto sa 330 ka miembro sa 21 ka POs sa Braulio E. Dujali.

Gawas sa pagpamaligya’g bugas ug feeds, gisugyot sab ni Kuya Gob pinaagi sa Executive Assistant nga samtang dili pa makaabot ang ikaduhang cycle sa KAAGAPAY chickens, mas maayo nga magbuhi una og mga “broiler” kay andam sab mogahin og pondo si Board Member Atty Jigs Relampagos para sa maong proyekto.

“Pag-harvest sa inyong manok, naa mo’y kita, naa mo’y ganansya anang first dispersal. Ang among advice pagbuhi mo og broiler kay sayang kaayo ang duha ka bulan nga nakatiwang-wang ang inyohang kulongan nga wa mo’y gibuhi. Sayang kaayo. Palit mo’g broiler kay mas dali mangita og piso nga broiler kay sa free-range chicken para moabot ang panahon nga second dispersal na ta, ma-harvest pa nato ang inyohang broiler. . Naa pa mo’y panahon mag-disinfect sa inyong kulongan. Another income sa asosasyon. Unya si Attorney Jigs Relampagos andam motabang, andam mogahin og pondo para ipalit og mga piso nga broiler,” nagpadayon ang mensahe-tambag ni Kuya Gob pinaagi sa Executive Assistant.

Kahinumduman nga gilunsad ni Gobernador Jubahib ang food-security program nga KAAGAPAY niadtong Hunyo 2020 gumikan sa COVID-19 pinaagi sa pagtanom og gulay ingon man pagbuhi’g manok aron mapugngan ang kanihit sa pagkaon. Pananglit dunay sobrang gulay, ang KAAGAPAY ra sab ang mopalit ingon man ang gipadagko nga mga manok.

“Ang probinsya ang mopalit. Asa man mo kakita’g programa nga tagaan og dispersal nga manok unya ang mopalit ang naghatag lang gihapon. Only in Davao del Norte under the leadership of Kuya Gob Edwin Jubahib,” pamatuod ni Board Member Engr. Franklin Gentiles.*****************///

DavNor News

nainggo