SOBRA P30.43 milyones nga pondo gikan sa Department of Labor and Employment - Tulong for Disadvantaged and Displaced Workers (DOLE-TUPAD) ang “nasungkit” ni Gobernador Edwin “Kuya Gob” Jubahib aron ma-sweldohan ang mga benepisyaryo sa KAwsa sa AGrikultura ug PAnginabuhian sa barangaY (KAAGAPAY).

Hangtod ning pagsulat adunay 7,518 ka benepisyaryo nga nakadawat sa TUPAD payout. Ang matag beneficiary nakadawat og P3,960 alang sa napulo ka adlaw nga pagtanom sa kahoy ingon man paghimo’g kulongan sa manok.

Gumikan sa COVID-19, gilusad ni Kuya Gob ang programang KAAGAPAY sa tuyo nga mapugngan ang kanihit sa pagkaon dala sa pandemya. Ang programa nag-awhag sa katawhan nga magtanom og gulay, kahoy ingon man ang pagpadagko og manok nga libreng gihatag sa probinsya. Gikinahanglang lang nga magporma ang mga benepisyaryo ingong People’s Organization (PO) aron makadawat og hinabang sa gobyerno. Ang KAAGAPAY ra sab ang mopalit sa sobra produktong gulay ug ang napadagko nga manok.

Hangtod ning pagsulat, miabot na og 24,162 duha ka bulan KAAGAPAY chickens ang naapod-apod ngadto sa 239 ka mga People’s Organizations nga ilang padakoon sulod sa 45 ka adlaw. Para sa first cycle nga pagpanghatag, duna pa gyod libreng feeds sa manok ang pakapin.

Matod ni Executive Assistant Newell de Ramos nga gipaningkamotan gayod ni Gobernador Jubahib nga makasungkit og pondo gikan sa TUPAD aron matabangan ang katawhan sa kalisod gumikan sa pandemya.

“Kining DOLE-TUPAD program nasungkit ni Kuya Gob Edwin Jubahib gikan sa Department of Labor nga naghangyo nga unta naay ayuda gikan sa DOLE . . para iapod-apod sa mga membro sa KAAGAPAY, labina nga nakagasto pod mo sa inyohang paghimo’g kulongan,” pahayag sa Executive Assistant atol sa TUPAD payout didto sa Braulio E. Dujali niadtong Huwebes, Septyembre 23.

Si Norlyn S. Cerdena nga membro sa Little Chicken Farm KAAGAPAY Association sa Tanglaw, Dujali maoy usa sa 330 ka mga KAAGAPAY beneficiaries nga nakadawat sa TUPAD payout nagpasalamat kay duna na’y ikapalit sa ilang kawad-on.

“Daghan gyod kaayong salamat. . . Ipalit nako sa among kawad-on sa among balay. . . Salamaaat kaayo,” matod ni Norlyn.

Gipasabot hinuon ni Executive Secretary to the Governor Greg Facula nga dili tanan makadawat sa TUPAD payout sanglit balaod sa DOLE nga dili maapil ang mga 4Ps members ug kadtong adunay ginadawat na gikan sa gobyerno.

Samtang padayon ang pagpadaghan sa mga piso diha sa DavNor Livestock Production Center, padayon sab ang pagpanghatag sa mga KAAGAPAY chickens sa kwalipikadong mga POs.

*****************///

TUPAD payout in Braulio E. Dujali

Manok, feeds, trichantera ug TUPAD payout para sa mga KAAGAPAY beneficiaries

 

 

 

DavNor News

nainggo