SEVENTY EIGHT PERCENT (78%) sa mga na-hospital nga natakdan sa sakit nga COVID-19 walay bakuna.

Mao kini ang gibutyag ni DavNor COVID-19 Inter-Agency Task Force Head Dr. Alfredo Lacerona ug kasamtangang Department Head sa Davao del Norte Provincial Health Office nga midugang nga naa lamang sa 10% first dose bakunado ug 12% second dose bakunado ang na-hospital sulod lamang sa bulan sa Agosto, 2021.

Wala pa’y labot niiini kadtong wala magpa-swab ug wala magpa-admit sa mga hospital.

“Naay 78% nga unvaccinated. Kadto nang month of August. Month of September mogawasay pa apil na tong pila ang na-hospital sa mga fully vaccinated,” matod ni Dr. Lacerona nga nagpakita sa consolidated report gikan sa mga hospital.

Labot sa recovery sa mga nasakit, gitug-an sa DavNor IATF head nga dali gyod naka-recover kadtong nabakunahan.

“Kasagaran sa vaccinated mild ra gyod siya,” dugang sa doktor uban sa pagpasabot nga kadtong nabakunahan dili parehas ang kagrabehon sa sakit kung itandi niadtong walay bakuna ug nga dali ra sab maka-recover gikan sa COVID-19 ang bakunado.

MIKUNHOD NGA GIDAGHANON SA MIABOT NGA BAKUNA

Nabalaka ang DavNor IATF ilawom sa administrasyon ni Gobernador Edwin “Kuya Gob” Jubahib nga dili makab-ot ang ilang target “herd immunity” niining tuiga gumikan sa pagkunhod sa gidaghanon sa miabot nga bakuna bisan pa sa maayo ug paspas nga implementasyon sa Davao del Norte.

Gitug-an ni National Immunization Program (NIP) Provincial Coordinator Neidel Feah Ferido nga dunay 17,550 (Pfizer) ang miabot niining adlawa (Martes).

Kahinumduman nga niadtong kataposang semana sa Agosto sobra 30,000 doses nagkalain-laing bakuna ang miabot sa probinsya apan mikunhod sa miaging semana ngadto sa 10,000.

“Karon lang gyod ni na-received, so kung naa sila’y daghan ihatag, ihatag gyod na nila,” matod sa NIP DavNor Provincial Coordinator.

Labot sa “wastage,” matod ni Ferido nga gipaningkamotan gyod nga dili masayang ang bakuna ug kasagaran sa “nausik” maoy wala pagtungha sa tawo nga bakunahan ug kadtong wala ma-ensakto nga dosage.

“Minimal kaayo. Kana lang halimbawa Moderna. Ang atong Moderna is ten doses. Ang uban mag-second dose nga dili moabot unya naka-distribute na tanan og papel. Gawas og naay newcomers nga first dose mahatag siya. . . Naay uban dili ensakto nga point five (.5) labina ang Sinovac. Dili man gyod nato siya pwede ihatag ni,” pasabot ni Ferido.

Sa Davao del Norte, gisugdan sa Davao Regional Medical Center (DRMC) ang RESBAKUNA niadtong Marso 8 ug ning pagsulat naabot na ang 18.2% (135,972) fully vaccinated ug 24.6% (183,048) partially vaccinated sa 744,405 ka tawo nga angay makadawat og kumpletong bakuna aron makab-ot ang “herd immunity.”

DavNor COVID-19 cases January 2021 until September 26, 2021

COVID-19 deaths in DavNor June 2021 until September 26, 2021

DavNor NIP Provincial Coordinator Neidel Feah Ferido reporting in the presence of DavNor Luntiang Paraiso Regional Rehabilitation Center Head Dr. Nilo Parrenas.

 

DavNor News

nainggo