Miarangkada pagbalik sugod kagahapong adlawa ang voter’s registration sa Commission on Elections (Comelec) human sa walo ka adlaw nga filing sa Certificate of Candidacy nga natapos niadtong milabay’ng Biyernes.

Sugod gahapon Oktubre 11 hangtud na sa Oktubre 30 modawat na og aplikante ang Comelec nunot sa gihatag nga ekstensyon sa central office.

Luyo sa gihatag nga lugway, nanawagan ang Comelec DavNor Region XI nga mintras layo pa ang ikaduhang deadline kinahanglan modangop na ang mga buot magparehistro ug dili na hulaton pa ang katapusang adlaw.

Matud ni Lea M. Mamites, Comelec DavNor Election Assistant, nga hantud alas 5 sa hapon taman ang pagdawat sa tanang klase sa aplikante, ma-registration, ma-transfer ug lain pang uban.

“Extension sa registration until October 30. From Monday to Friday only, 8am-5pm, dili na tong 8am to 7pm. All types of application. So dapat katong mga wala pa nakarehistro/na-transfer adto namo sa kada election officer’s offices”, pag-awhag ni Mamites.

Dugang niya, modiretso lang sa mga opisina sa comelec sa matag LGU sanglit giwala na ang mga satellite registration sites sa mga barangay gawas lang sa mga malls sa Tagum City nga padayon gihapong ga-operate sama sa Robinsons, Citimall ug NCCC.

Sa pagsaysay ni Mamites sa kinatibuk-ang sitwasyon sa nahitabong filing niaging semana, 33 ka buok kandidato ang midagan sa probinsya gikan congressman padulong board member. Hapsay ug malinawaon ang ilang pagdawat sa mga COC.

Karong adlawa nakatakdang molupad ang ilang team aron sa paghatud ug pagsumite sa mga COC files alang sa Davao del Norte didto sa kaulohang Manila.