Personal nga gibisita ni Mayor Jorjan “Monet” B. Federiso ang Casilak Waterfalls nga nahimutang sa Sitio Casilak, Brgy. New Cortez, New Corella, Davao Del Norte, Huwebes sa buntag.

Kuyog sa opisyal ang mga personahe sa Tourism Office, uban sa mga land owners ug opisyales sa barangay.

Human sa taas nga restriksyon niadtong mga miaging bulan, gidugok sa mga tawo ang Casilak Falls ug karon aduna nay tulo ka-resorts nga gadawat og mga turista sama sa Gedorio Falls, Bamboo Falls ug Casilak Falls (Busay).

Asoy pa sa mga nanag-iya sa maong luna nga aduna pa’y pipila ka mga busay nga anaa sa ubos nga bahin sa nasangpit nga lugar.

Sa pagbisita ni Mayor Monet, nakita niya nga dako ang potensyal sa Casilak Falls nga mahimong sentro nga lugar sa turismo sa lungsod.

“Paninduton ug iplastar nato kini, ug prayuridad natong pondohan karong tuig 2022,” bungat ni Mayor Monet.

Ang maong pagbisita gisundan gilayon og pakigpulong tali sa munisipyo ug sa mga land owners, kauban ang mga opisyales sa Brgy. New Cortez, diin ilang gipaabot ang kusganong suporta sa mga plano sa mayora.

Ipahitabo ang pinirmahay sa Memorandum Of Agreement (MOA) tali sa Lokal nga Panggamhanan ug sa mga tag-iya labot sa paglihok ug pagpundo sa nasangpit nga laaganan human sa panagsabot.

Giawhag usab ni Mayor Monet ang mga turistang mobisita nga mag-amping kanunay samtang ginasugdan pa ang papanindot ug pagplastar sa maong atraksyon.

Nahisubay ang maong plano sa plataporma de gobyerno sa kasamtangang pamunoan nga SERVICES, diin ang naunang “E” nagpunting sa “Eco-tourism and Agricultural Development” alang sa pamilyang New Corellahanon.

Writer: Jannie Lynn Lasquite
Photos: Jannie Lynn Lasquite, Leslie Ann Pates

Source: New Corella LGU