NANINGKAMOT pag-ayo ang Provincial Health Office kauban ang 11 ka mga Local Government Units sa probinsya nga ilang maabot ang 187,000 fully-vaccinated individuals niining semanaha o’ sobra 25% sa 744,405 ka tawo nga angay’ng mabakunahan.
Sa milabay’ng semana katibuk-ang naabot ang 22.7% vaccination rate ug naglaom ang probinsya nga makab-ot ang herd immunity kun 70% sa populasyon (744,405) sa dili pa mahuman ang tuig.
Wala hinuon magpasabot nga walay mga babag.
“Kanang uban lagi nga mga tinuohan nga dili sila magpabakuna. Maglisod gyod mi, maglisod gyod mi maskin pa unsaon pa namo’g edukar sa ilaha, nga ilaha gyong kabubut-on nga dili sila magpabakuna. Mao nang gamay pa gihapon ta’g porsento nga mabakunahan tungod sa ilang mga tinuohan ba,” pamahayag ni Provincial Vaccination Center Head Dr. Eleanor Salva.
Nga wala mag-ngalan, mihangyo si Dr Salva nga unta ang mga Local Chief Executives magpabakuna aron mahimong ehemplo sa ilang mga lumulupyo sa LGU.
Samtang nagpadayon ang RESBAKUNA, ang mga Senior Citizens lakip na ang dunay mga comorbidities wala magduha-duha nga magpabakuna apil ang 67-anyos nga Canadian national nga gustong anhi na magpirme mopuyo sa Tagum City.
“There’s no problem with the vaccine. I think it’s very important so that people would become safe. We need to protect ourselves. And in past, people that I know they died because of no vaccine. So they need to come, they need to get the vaccine,” matod sa 67-anyos nga Canadian national Allen Lou Wall.
Nga nagduhaduha sa sinugdan, nakadesisyon ra gyod si Alfredo nga taga Panabo City ug mianhi sa Kapitolyo vaccination site aron mabakunahan sa first dose.
“Nagpabakuna ko para proteksyon sa atong lawas ug kun molakaw ta wala na’y problema. . Sa una ing-ana pod ko pero nabati nako sa radio, sa tv, unya sa gobyerno man ni, maong pabakuna ko,” tug-an sa 63 anyos nga senior citizen.
Kauban ang duha ka anak, nagsakay og de-pasaherong bus ang 58 anyos nga si Wilma, taga Magsaysay, Carmen aron ma-second dose bisan pa kung gi-dialysis.
“Nag-ari gyod ko sa Tagum, nagpabakuna gyod ko kay vulnerable man tanan masakiton, kinahanglan pabakuna jud. Scond dose na nako ni, fully vaccinated na ko. . . para layo ko sa COVID virus pabakuna gyod ko. . . Naay ubang nag-dialysis wa man pabakuna, positive hinuon sila ron. . . Kaming tanan fully vaccinated na mi,” tug-an ni Wilma.
Una pa mabakunahan ang isa ka tao, kinahanglang nga ipailawom una sa screening ug check-up sa doktor.
“Nanawagan ko nga dili maghadlok-hadlok, magpabakuna. . ako nga dialysis patient okey ra, fully-vaccinated na ko,” panawagan ni Wilma sa parehas niya nga “vulnerable” nga magpabakuna sab.
Sa talaan sa DavNor PHO, ang lungsod sa Talaingod ang pinakaubos og vaccination rate nga 10.5% sa 11 ka LGUs sa probinsya.
Kahinumduman sab nga ang PHO nagpagawas og pahamangno nga 78% sa mga na-hospital nga natakdan sa COVID-19 walay bakuna.
