GIPASIDUNGGAN sa administrasyon ni Gobernador Edwin “Kuya Gob” Jubahib ang 64 ka mga indibiduwal ug mga institusyon sa ilang kontribusyon alang sa kalamboan sa pamahayag ug arte sa Davao del Norte ingong pagtimaan sa Press Freedom Month Celebration matag bulan sa Oktubre.

Pinaagi sa Provincial Information Communication Knowledge Management Office (PICKMO) gihimong “by batches” ang paghatag pasidungog gumikan sa COVID-19 nga pandemya. Dili sab ipahinabo ang naandan nga Media Summit ug ang panagtapok sa tanang sakop sa quad media (print, broadcast, tv ug online outlets) sa paglikay nga adunay matakdan sa virus.

Giila gayod sa kasamtangang administrasyon ang kagawasan sa responsableng pamahayag ingong katungod ilawom sa demokratikanhong sistema sa gobyerno samtang wala sab gikonsentir niini ang irresponsableng pagpahayag ingong “lisensya” sa pataka o tinutumo mga eskpresyon sa kagawasan.

Ang tinuig nga DavNor Press Freedom Month gipaluyohan sa Provincial Ordinance 2008-002. Ang 2021 nga kasaulogan nagdala sa tema: “Responsableng Pamahayag: Tinubdan sa Kalinaw, Kahiusahan, Kalambuan ug Kadaugan.”

Makita ug mabati ang katibuk-an “Parangal sa Natatanging Kontribusyon sa Pangkaunlarang Pamamahayag at Sining” sa gipanag-iyahan sa probinsya nga 91.1FM DXNR radio, PTV DavNor 48 (free tv) station, LoveNet Channel 26 (cable) gawas pa sa One DavNor Network ug PTV DavNor 48 facebook pages sa Oktubre 29, 2021.

**************************//

 

DavNor News