Nasakmit sa lalawigan sa Davao del Norte ang Best in Government Covid-19 Pandemic Response Award, atul sa gipahigayon nga Digital Governance Awards 2021, tungud sa pagpatuman niini sa Davao del Norte Covid-19 Information Management System (DCIMS).
Ang maong special award ginahatag sa mga local government units (LGUs) nga mipakita sa ilang pagkamamugna-on ug pagkamapahiangayon sa paghatud sa mga serbisyo pinaagi sa bag-ong teknolohiya taliwala sa wa damha nga pandemya.
Kahinumduman nga pag-abot sa krisis sa Covid-19, gilusad ni Governor Edwin “Kuya Gob” Jubahib ang kanhi COVID-19 Contact Tracing System (DCCTS) nga karon nahimong DCIMS, aron mapugngan ang pagkuyanap sa virus.
Giparesan kini sa gobernador sa ‘No QR Code, No Entry Policy’ sa tanang mga opisina ug establisimento sa lalawigan.
Gidayeg sa mga opisyales sa Department of Health (DOH)-XI ang maong polisiya, isip epektibo nga hinagiban sa pagpugong sa pagkuyanap sa virus sa lalawigan.
Sa sinugdan, tumong sa DCIMS ang pag-ila sa mga tawo nga posibleng dunay close contact og nakaduol o nakahikap sa kadtong tawo nga nagpositibo sa sakit ug aron pugngan ang mga infected, PUM, PUI, mga menor-de-edad ug ubang gidid-an nga mga tawo, sa pagsulod sa mga establisemento, pinaagi sa QR Code scanning.
Tungod sa mga sugyot sa katawhan, gibag-o ang maong ‘system’ aron iapil ang impormasyon sa mga bakunado nga indibidwal ug ang brand sa vaccine nga gigamit, dali nga pagkuha sa datus sa Vaccination Administration System (VAS), ug ‘integration’ sa DCIMS ug sa Information on Tourists and Residents Against Covid-19 System (ITRACS) sa Island Garden City of Samal, ug uban pa.
Sulti ni Provincial Human Resource Management Officer Edwin Palero nga nakuha sa probinsiya ang pasidungog tungod sa “political will” kon kabubut-on ni Kuya Gob ug sa dakong suporta sa mga LGUs, mga kompanya, ug tanang hut-ong sa katawhan.
Dugang ni Palero, kinsa mao sab ang chief sa Software Development component sa E-Governance Program sa Kapitolyo diin nakapailawom ang DCIMS, nga tungud sa kaisog ni Kuya Gob sa pagpatuman sa kabag-ohan, naablihan ang panghunahuna sa mga local officials ug nagkadaiyang sektor mahitungod sa kamahinungdanon sa paggamit sa Information Communication Technology (ICT) aron sa pagtubag sa pandemya.
“Walay pulos ang atong dakong gasto sa pag-adopt sa technology kung dili mosuporta ang mga mayores, mga kapitan ug nagkadaiyang sektor. Mao nga kini nga award kadaugan sa singgit sa katawhan sa Davao del Norte nga mao ang One DavNor, One Team,” ingon ni Palero.
Gibutyag sab sa department head nga dako kaayo ang tabang sa ‘system’ nga wala jud gipaubos sa “total lockdown” ang probinsya ug gitugot ang pagbiyahe sa panahon sa Enhanced Community Quarantine (ECQ) sa miaging tuig.
Pinaagi sa system, gitugot ang pagbiyahe pasulod ug pagawas sa lalawigan, sa kundisyon nga mokuha og QR code ang mga biyahidor ug moagi sa ‘scanning’ sa mga entry ug exit points.
Ang mga biyahidor nga ma-tag sa scanner isip “traveler” kinahanglan mopaubos sa pito ka adlaw nga kwarantina ug dili makasulod sa mga opisina ug establisemento.
