Dili lamang isa, apan tulo ka plaques of recognition ang nasungkit sa DSWD XI – Davao del Norte Provincial Operations Office sa gipahatibo nga kauna-unahang Gawad Pagkilala 2021, niadtong Oktubre 29, subay sa pagsaulog sa Press Freedom Month sa probinsya.

Ang maong pasidungog gihatag sa Probinsyal nga Panggamhanan ubos sa liderato ni Kuya Gov. Edwin I. Jubahib, pinaagi sa Provincial Information, Communication and Knowledge Management Office (PICKMO) ngadto sa ahensya tungod sa dakong kontribusyon niini sa pagpakusog sa pangkalambuang pamahayag ingon man sa paghatag og bili sa malungtarong pag-uswag sa kinabuhi sa katawhan ug katilingban.

Nakuha sa ahensya ang 2021 Parangal sa Natatanging Kontribusyon sa Pangkaunlarang Pamamahayag at Sining. Kapareho nga pasidungog ang nakuha sab ni DSWD-Pantawid Provincial Link Blaissel Jane L. Fernandez ug Social Welfare Officer III Jennylou B. Maglasang.

Sumala pa sa PICKMO, usa sa hinungdan sa pagtaas sa viewership sa PTV Davao del Norte, listenership sa DXNR Radio 91.1 FM ug engagement sa One DavNor Network Facebook page mao ang paglambigit sa DSWD sa mga tele-radyo programs sa nasangpit nga mga government-managed stations pinaagi sa Family Development Sessions on Air. Nahimong ‘house-hold name’ ang tele-radyo program nga Kasamtangang Katikaran sa Kalambuan o mas nailhan sa KKK sa mga benepisyaryo sa Pantawid Pamilyang Pilipino Programs kon 4Ps ug sa Modified Conditional Cash Transfer – Indigenous Peoples.

64 ka mga grupo ug indibidwal ang nahatagaan og pasidungog sa Probinsyal nga Panggamhanan karong tuiga.