WA NA MAGDUHA-DUHA ang magtiayon gikan sa San Francisco, Panabo City og nagpabakuna na gyod niadtong Nobyembre 4 kauban ang ilang tulo ka menor-de-edad nga anak samtang ang mga batan-on midugok sab sa DavNor Provincial Vaccination Site ingong pangandam sa face-to-face (F2F) nga klase.

“Actually kaming mag-asawa nagduhaduha gyod sa unang pag-invite sa amoa nga naa na mi eskedyul unta. Among nahunahunaan, kami ma-vaccinated na unya among mga anak wala, morag luoy sila. Kung baga kami secure na kay vaccinated na pero among anak wala pa, so mao tong nagpaabot gyod mi nga naay moabot nga ma-approve, nga naa na’y vaccine para sa mga bata. So mao tong naa na’y pwede sa mga bata eskedyul karong adlawa, so mao tong nagdali-dali mi nga pa-registered nga ma-vaccinan mi nga kami na gyod nga pamilya,” matod ni Lucilo Sacal.

Gipamatud-an sab sa pamilyang Sacal nga bakak ug dili tinuod nga mahimong “zombie” kung mabakunahan kay silang tibuok pamilya okay kaayo human sa ilang injection.

“Akong gihangyo akong mga kaila, akong ubang ka-paryentehan nga dili na ta motuo nga ma-injectionan ta nga mahimo tang zombie kay dili na tinuod. Para man ni sa atong kaayohan ug sa atong pamilya,” panawagan ni Lucilo sa iyang mga paryente nga nagduha-duha pa nga magpa-vaccine.

Ang ig-agaw nga Junie May Peralta ug Jabez Cortez nagpabakuna kay basin okay na ang F2F nga klase sunod tuig nga nanawagan sab sa ilang mga paryente ug classmates.

“Nagpabakuna ko as preparation kay kintahay magsugod na ang face-to-face, at least vaccinated na ko. Dili man hinuon sakit. . Sa tinuod lang ang pagpabakuna mao ni siya way nato nga mabalik ta sa normal,” matod sa 17-anyos nga Peralta samtang ang iyang ig-agaw nagpabakuna dili lang kay “trending” sa mga batan-on hinuon pangandam sab sa pisikal nga klase.

“Dili man trending kay in preparation sa F2F classes ug aron dili pod matakdan og dali sa COVID-19,” sulti ni Jabez.

Pero para kang Eldridge Baruiz, 15-anyos, ang pagpabakuna “kailangan” gyod.

“Kay kailangan man, then isa pa recommended. Then akong age nakuan man pod sa vaccine. So okay lang sa akoa,” pahayag ni Eldridge.

Niadtong Huwebes, Nobyembre 4, ang DavNor Provincial vaxx site nakabakuna og 388 ka 12-17 anyos lakip ang 38 ka batan-on nga dunay comorbidities.

Kasamtangan, padayong gihimo ang pagpangbakuna sa general population ingon man sa mga menor-de-edad sa tibuok probinsya apan ning panahon sa pagsulat 28% lang ang nakadawat sa kumpletong bakuna samtang 39% ang nakadawat sa first dose nga layo pa sa 70% aron makab-ot ang herd immunity.

*****************////

DavNor News

nainggo