GIDUGOK ang unang adlaw nga nagpahigayon ang Provincial Health Office Vaccination Team sa RESBAKUNA para sa mga 12-17 anyos ug hangtod ning pagsulat hapon alas 3:45 Nobyembre 4, 2021, sobra na tulo ka gatos ka mga kabataan ang nabakunahan.
Gamit ang Pfizer vaccine para sa mga menor-de-edad, ang RESBAKUNA gipahigayon sa DavNor Clubhouse sulod sa Sports Complex nga gidugok sab sa mga hamtong ug mga senior citizens.
Ang security guard nga nanghatag og priority number mitug-an nga miabot na og 575 ka number slips ang ilang nahatag sa mga gusto magpabakuna sa first dose bisan pa man sa diyutay’ng “kaguliyang” sayo sa buntag sa pagkuha og numero kay halos ang tanan gusto nga ma-una.
Matod ni Provincial Vaccination Operation Center Head Dr. Eleanor Salva nga tungod sa positibong sanong ilabina sa mga batan-on ug mga ginikanan, magpahigayon gihapon sila og first dose vaccination Nobyembre 5 alang sa mga 12-17 anyos bisan kung ilang naandan nga matag Byernes pulos second dose lang ang ihatag.
Apan una moadto sa vaccination center angay seguroon nga madala ang medical certificate gikan sa pediatrician pananglit adunay comorbidity ang bata. Dalhon sab ang birth certificate ingon man magdala og dokumento sama sa ID pagmatuod nga sila ang ginikanan o guardian sa bata.
Kahinumdoman nga sukad pa niadtong Marso 2021 nag-awhag na si Gobernador Edwin “Kuya Gob” Jubahib nga magpabakuna kung mabatonan na ang mga vaccines. Katuyoan sa iyang administrasyon nga makab-ot ang “herd immunity” (70% sa populasyon sa probinsya nga mabakunahan) sa dili pa mahuman ang tuig 2021.
********************///
