GITUNOL sa Department of Trade and Industry (DTI) ang P452,500 kantidad sa kagamitan alang sa pagproseso sa kape ngadto sa Talaingod Coffee Growers Association (TACOGA).
Ang pormal nga pagtunol sa coffee pulper, platform, weighing scale, floatation drum, coffee huller, dryer ug ubang kagamitan gitiman-an pinaagi sa pagpirmahay sa Memorandum of Agreement (MOA) Nobyembre 9, 2021 didto sa Uraya’s Peak, Sto. Niño, Talaingod.
Uban sa kusganong suporta sa administrasyon ni Gobernador Edwin “Kuya Gob” Jubahib, katuyoan sa DTI nga matabangan ang TACOGA nga makab-ot ang damgo nga mahimong Coffee Corridor sa probinsya, sa Rehiyon XI ug bisan sa tibuok nasod sa sunod nga mga adlaw.
“Makahatag gyod ni og economic impact para sa mga farmers kay maka-expect na ta og production, maka-expect na ta og quality product nga ilang ma-package, ilang mabaligya. Unya pinaagi sa RAPID growth project naa na pod ready market. . . So ang challenge nato dinhi as of now, is volume. Mao na we encourage them to continue planting coffee varieties both Arabica and Robusta,” matod ni Provincial Director DTI-DNPO Romeo Castañaga.
Sa pakig-alayon sa DTI, kahinumduman nga sa miaging tuig gilusad ni Kuya Gob ang programa nga himoon ang lungsod sa Talaingod ingong Coffee Corridor gumikan sa kalapad sa kayutaan nga haom sa tanom nga kape ilabina sa Arabica variety pinaagi sa Provincial Agriculture Office (PAGRO).
“Ang production support naa mi naandam nga mga seedlings. . . This year naa mi nahatag nga more than 40 thousand nga Arabica para sa ilaha. Naay 10 thousand seedlings nga Robusta nga intended didto sa mga area nga below 1,000 (feet) specific didto sa Kilometer 31, Tibucag ug kanang iyang mga silingan nga areas. Aside anang production support, naa pod mi training support services nga bag-o lang na-conduct karong tuiga, September. So continuous gihapon ang among production support para sa ilaha. Naa na pod mi mga 5,000 Robusta seedlings hopefully ma-distribute na namo then ang plano namo next year, mag-propagate na pod mi og Arabica ug Robusta nga seedlings. Hopefully dagko na next year og padulong na gihapon sa Talaingod. . Naa pod mi mga fertilizers nga ihatag para kanila. . kauban na didto sa production support,” pagbutyag ni Engr. Benjamin Graza sa DavNor PAGRO.
Gidugang sab ni DTI Provincial Director Castañaga nga gumikan sa programa ni Kuya Gob, mahimong “kumpleto” ang panginahanglan sa TACOGA; ang value chain aspect nga ilang gitabang ug ang production support sa DavNor LGU.
“Pagtan-aw man gud nato ani is complete value chain so kini, kadto lang gyod sa processing nga banda, kay Kuya Gob maoy nag-complete kay gitan-aw ang production. So tama nga nagahatag ang PAGRO kanang planting materials, naga-encourage sa mga Local Government Units sa pag-prioritize sa kape dinhi sa Talaingod ug sa other commodities in other municipalities and sa pag-market although ang DTI nagtabang pod. Pero pinaagi sa KAAGAPAY program, holistic siya not only production but marketing support,” dugang sa DTI Provincial Director.
Pinaagi ni TACOGA President Bonifacio Obongen, ilang gidawat ang hagit ug positibong nanglantaw ang asosasyon nga himoong Coffee Corridor ang lungsod sa Talaingod sa Davao del Norte, sa Rehiyon XI ug bisan sa tibuok nasod.
