Pormal nga gipirmahan ni DA-RFO XI Executive Director Abel James I. Monteagudo ug Governor Edwin “Kuya Gob” I. Jubahib ang memorandum of agreement sa market development assistance nga nagkantidad ug usa ka milyon pesos gikan sa Balik Probinsya Bagong Pag-asa Program alang sa DavNor Kaagapay Program gahapong adlawa, Nobyembre 9, 2021.

Kahibaloang gipirmahan ni Presidente Rodrigo Roa Duterte niadtong Mayo 6, 2020 ang Executive Order no. 114 s.2020 nga mao ang “Institutionalizing The Balik Probinsya, Bagong Pag-asa Program as a pillar of Balance Regional Development, creating a council therefore, and for other purposes.”

Kini nga programa, usa ka estratehiya sa gobyerno aron makab-ot ang balanseng kalamboan sa tanang rehiyon, masiguro ang kaharuhay sa matag dapit ug mapatuman ang mga inisyatibo padulong sa lig-on ug malamboong komunidad.

Subay niini, namugna ang “Balik Probinsya, Bagong Pag-asa Program Market Development Assistance to KAAGAPAY Program” nga nagtinguhang matabangan ang mga Dabaonong “stranded individuals” nga naapektohan sa pandemya pinaagi sa paghatag og oportunidad sa panginabuhian ug pagsiguro sa sakto nga presyo sa ilang produkto aron makabaton og dakong kita.

Ang maong kantidad itagana alang sa pagpalambo sa panginabuhiang free-range chicken ug uban pang kinahanglanon sa maong produkto.

Mipahayag si Director Monteagudo sa iyang pagdayeg sa programang DavNor KAAGAPAY kon Kawsa sa Agrikultura ug Panginabuhian sa Barangay sa paghatod niini og dakong tabang sa katawhan sa Davao del Norte.

Nagpasalamat usab si Kuya Gob sa dugang pinansyal nga ayuda sa pagpalambo sa panginabuhian sa iyang ginsakupan.

 

 

 

DavNor News

nainggo