BISAN DILI MAKADATO apan nakatabang gayod og dako ang food-sufficiency program nga KAwsa sa AGrikulturA ug PAnginabuhian sa barangaY kun KAAGAPAY.

Kahinumduman nga gilusad ni Gobernador Edwin “Kuya Gob” Jubahib ang KAAGAPAY gumikan sa COVID-19 pandemic pinaagi sa paghatag og nagkalain-laing seeds sa gulay, pagtanom og mga kahoy ug ang pagbuhi sa free-range chicken nga manok nga paliton ra sab sa probinsya.

Si Joseph Rizon, 33 anyos nga taga Purok 1-B, Magwawa, Sto. Tomas, Davao del Norte dako kaayo’g pasalamat sa binhi nga libreng gihatag sa KAAGAPAY pinaagi sa Provincial Agriculture Office (PAGRO). Ang mga binhi sa kalabasa mibunga’g maayo nga ang halin nakapalit og kabaw niadtong hinapos sa Agosto.

“Ang nadawat nako nga seeds sa KAAGAPAY talong, upo, ampalaya, kalbasa, pepino ug okra. Gitanom namo ang kalabasa, okay ra kaayo, naka-income-income pod mi atong pag-harvest namo. . Ang maayong butang napalit namo sa halin sa kalabasa, kabaw. Mokabat gyod to og fifteen o mokulang og fifteen tons, tag 7 ang kilo,” saysay ni Joseph.

Kauban ang iyang igsoon, gitikad nila ang halos duha ka ektaryang luna nga gitamnan sa kalabasa ug lain-laing klase sa gulay nga human sa ilang pagbahinay sa halin giseguro ni Joseph nga makapalit og kabaw.

“Kay gamit man gud ni sa pang-uma ang kabaw labina sa pagsugod namo pag-ugmad sa uma, among darohon sa daan para ang kalabasa maayo ang pagturok,” padayong pag-asoy ni Joseph nga mapasalamaton kaayo sa programa ni Kuya Gob.

“Ang akong ikasulti sa programa ni Gob Edwin Jubahib maayo kaayo, kay makatabang sa sama sa amoa na pobre og walay ikapalit sa mga semilya sa merkado. Dako kaayo ning tabang sa amoa. Tungod ani na-arang-arang jud among pamuyo ug dako pong pasalamat nako sa nagpamembro sa akoa dire, sa akoang magulang, si Joel Camagong ug sa akoang bayaw nga gipatanom mi diria sa iyang area, mao nang nakapalit mi’g kabaw. Wa ra mi maglisod pinaagi sa programa ni Kuya Gob Jubahib.

Gawas sa kabaw, mapahiyomon si Joseph nga mitug-an nga ang ubang halin ilang gipalit og konsumo.

“Konsumo, kapalit pod mi’g konsumo, bugas; kapalit po’g lechon pero dili pirme. Naa man po’y gulay kay maayo man ni sa lawas. Bahala’g payat ko mokaon man pod ko’g gulay, abtik man,” dugang asoy ni Joseph nga nanawagan sa kaubang mag-uuma nga padayong magkugi nga naghangyo sab sa mga opisyal sa kagamhanan nga suplayan sila ug mga binhi nga itanom.

“Akong panawagan sa kauban nakong mag-uuma, kaubang membro sa KAAGAPAY nga magkugi lang gyod ta, di ta mawad-ag paglaom; bahala’g barato, magtanom lang ta’g sige. Basta naa lang ta’y itanom, naa ta’y anihon, unya ay lang jud pagpawa’g paglaum. Ampo lang pod ta sa Ginoo. . Akong hangyo lang unta, maayo kun daghan-daghan ang seeds ug pirme kay naa ta’y itanom para bale-bale,” pagpasibaw ni Joseph.

Gawas sa mga gulay, ang barangay Magwawa duna sab pito ka People’s Organizations nga nagpadagko og manok nga hatag sa KAAGAPAY. [Camera: Ryan O]