KUNG MAGKUGI DUNAY MAANI, KUNG MAGTANOM DUNAY PAABOTON!

Bisan pa kung sila nagtrabaho sa dili ilahang yuta (tenant) apan kini ang kanunay’ng tinamdam ni Fernandito ug Lenie Polloso sa Barangay Magwawa, Sto. Tomas, Davao del Norte nga niadtong Agosto 2020, miapil sa KAwsa sa AGrikulturA ug PAnginabuhian sa barangaY kun KAAGAPAY, ang food-sufficiency program ni Gobernador Edwin “Kuya Gob” Jubahib.

Kahinumduman nga gilusad ni Kuya Gob ang programang KAAGAPAY niadtong Hunyo 2020 gumikan sa pagsige’g lockdown tungod sa COVID-19 pandemic aron masagubang ang kanihit sa pagkaon pinaagi’g pag-awhag sa katawhan nga mananom og gulay, kahoy ug ang pagbuhi og manok nga ang produkto paliton ra sab pagbalik sa probinsya.

“Ang among nadawat nga seeds mga pinakbet. . Kadtong angay itanom deretso among gitanom, kadtong i-seedling nga seeds amo pod gi-seedlingan. . . Okay sab mobunga. Ang iyahang bulak deretso gyod, nataymingan pod to nga wala kaayo’y insekto,” matod ni Lenie ug Fernandito nga nakapalit og chainsaw dayon motorsiklo gumikan sa KAAGAPAY seeds nga gipang-apod-apod pinaagi sa DavNor Provincial Agriculture Office (PAGRO).

Human paghatag sa 20% bahin sa tag-iya’g yuta, nakatigom sobra P80 mil og ilang giuna’g palit ang chainsaw.

“Pirmero chainsaw. . Mao man goy uso dire’s amoa nga gabas-gabas, samot na og naay magpabalay. . Sunod mao ning motor. Pagpalit namo sa kompaniya nuybe; pero ako na’y nagkompleto, mikabat siya’g traynta,” tug-an ni Fernandito nga ang chainsaw kantidad 25 mil pesos samtang ang second hand motorsiklo mikabat og 30 mil pesos.

Nga adunay tulo ka anak, mapasalamaton kaayo ang pamilyang Polloso sa KAAGAPAY.

“Nagpasalamat ko’g dako nga hing-abot sa among kinabuhi kining KAAGAPAY nga mo-suplay og mga semilyang gulay ug makatabang gyod sa amoang panginabuhi apil na ang pagpanud-an. . Salamat kaayo sa ilang suporta nga mga seeds kay sa wala pa ang suporta nga seeds nagpalit jud mi sa una. Mahal oy kay kanang sachet sa kalbasa morag traynta ra ka buok 95 pesos, traynta ra ka seeds. Karon wa naman mi nagpalit kay naa na ma’y suplay, silingan man namo ni si sir Joel, siya may nagdumala dire pangtag-tag sa mga seeds,” dugang pagtug-an ni Lenie ug Fernandito.

Alang sa pamilyang Polloso ang KAAGAPAY ni Kuya Gob nakausab sa ilang pamuyo.

“Okay kaayo iyang programa kay maka-seeds mi. Pag-ting-harvest makapamalit pod mi sa among panginahanglan. . kapalit mi’g chainsaw pirmero, sunod kaning motor. Salamat kaayo Kuya Gob nga ang imong programa ing-ani; sa una gapalit mi karon wala na kay ga-suplay ka og mga seeds,” dugang ni Fernandito.

Nanghinaut si Lenie nga kanunay adunay maayong panglawas si Kuya Gob aron magpadayon ang KAAGAPAY.

“Nanghinaut pod mi nga hatagan siya’g maayong panglawas aron maayo ang iyahang pagsuporta sa mga tao. . Ang akong ikahangyo ni Gob nga unta ipadayon niya ang pagsuporta sa mga seeds sa amoa mga mag-uuma aron naa pod mi ikatanom sa andam nga limpyo nga yuta. Bisan man tuod tenant ra mi anang yutaa pero naningkamot jud mi sa ihatag sa amoa (seeds) aron naa pod mi mapaabot nga grasya.”

Si Lenie ug Fernandito membro sab sa Purok 3-B Magwawa KAAGAPAY Farmers Association sa pagpadagko og free-range chicken. [Pix--Ryan Omila]

*****************///