PADAYON nga gihatod sa KAwsa sa AGrikulturA ug PAnginabuhian sa barangaY (KAAGAPAY) ang mga pagbansay aron masangkapan ang mga beneficiaries sa kahibalo unsaon pag-atiman sa hustong paagi ang mga manok nga ilang padakoon.
“Nangita’g paagi ang Probinsya. . Si Kuya Gob nagsige’g hunahuna nga kung magsige lang ta’g panghatag di nato matudloan ang atong mga constituents unsaon pagkugi nga naa po’y suporta gikan sa goberno, so mao ning nahimo ning KAAGAPAY. Livelihood project ni siya, primerong gi-introduce pananom og gulay, nananom pod ta’g kahoy abot ta’g Talaingod, Kapalong, para maproteksyonan nato ang environment. Kaning last mao ning pagbuhi’g manok,” matod ni DavNor SP Floor Leader Board Member Franklin Gentiles nga mao ang mi-representar kang Gobernador Edwin “Kuya Gob” Jubahib didto sa Pag-asa, Kapalong.
Sa ilang paghimo’g kulongan, nakadawat sab og tig P3,960 sa napulo ka adlaw nga trabaho sa mga benepisyaryo gikan sa Tulong Panghanapbuhay sa Ating Disadvantaged/Displaced Workers kun TUPAD program sa Department of Labor and Employment (DOLE).
“Pero ang nakanindot karon kay naa diay mo’y suhol paghimo’g kulongan. Program pod ni sa national government, kaning TUPAD. Mao ni gimaniobra na pod nila Governor, Dok Tagalo ug mga prime movers nato nga i-synchronize ni siya sa programa sa KAAGAPAY,” padayong pahayag ni BM Gentiles.
Kahinumduman nga sa pagsugod sa COVID-19 pandemya, nagkapuliki ang administrasyon ni Gobernador Edwin “Kuya Gob” Jubahib paghatod sa tabang tibuok probinsya gumikan sa lockdown hinungdan nga lain-laing nasyonal mga ahensya ang giduolan alang sa funding labina ang DOLE.
Bisan sa iyang abanteng pangedaron desidido ang retiradong 73 anyos Noemi Pascua Claro sa Purok 3 Luna, Kapalong nga moapil sa KAAGAPAY aron dunay makat-onan.
“Because I was informed nga may KAAGAPAY and with that program it will help much, especially it will help us to learn to produce something nga makatulong sa among pagkinabuhi someday. And we are so thankful with Kuya Gob that he has that program. . Nindot kaayo nga programa because we could learn the proper way of raising chicken nga healthy and easy to grow with the cooperation, unity of members sa KAAGAPAY Luna,” pahayag ni Noemi nga alang kaniya nindot gyod ang programang KAAGAPAY.
“Ang akong masulti sa program sa KAAGAPAY is a very good (program) for the people, for the members because it will help the economic resolve and then it will help the family, the people,” matod ni Noemi nga misaad atimanon gyod nila pag-ayo ang mga manok agi’g apresasyon sa maayong programa ni Kuya Gob.
Aron maseguro ang maayong pagtubo, migahin ang Purok 3 Luna KAAGAPAY og “maintenance fund” alang sa feeds lakip ang pag-repair sa kulongan gikan sa ilang nadawat sa TUPAD. “Gibahinan” sab sa uban ang kaubang membro nga 4Ps kay sila dili kwalipikado modawat sa payout.
“Sa wala pa mi makadawat, ako silang gisultihan nga magtampo og 900 kay kadtong feeds gipadala sa manok lima ra man ka sako. Basig kulang ug naa po’y gamay’ng reperonon sa among kulongan kay kadtong kadugayana adto pang Marso gibuhat mao nang nagtampohay mi og 900 lang. Kung magsobra ning kwarta dili ni mawala kay open ang among listahan, open the record ni,” pasabot ni Francisco Manili, ang Presidente sa Purok 3 Luna KAAGAPAY nga dunay 29 ka membro.
